Ronald Kuman 2023-yil 1-yanvardan boshlab Niderlandiya terma jamoasi bosh murabbiyiga aylanadi. Bu haqida Niderlandiya futbol uyushmasi matbuot xizmati ma’lum qildi.
“Barselona”ning sobiq murabbiyi Kuman noyabr—dekabr oylarida Qatarda bo‘lib o‘tadigan JCh—2022 musobaqasidan so‘ng terma jamoani qabul qilib oladi.
59 yoshli mutaxassis Niderlandiya futbol uyushmasligi bilan 2026-yilga qadar mo‘ljallangan shartnomaga imzo chekdi.
Ayni vaqtda Niderlandiya terma jamoasiga Lui van Gal ustozlik qilmoqda. Avvalroq 70 yoshli mutaxassis saratonga chalingani va kasallik bilan kurashayotgani xabar qilingandi.
Qayd etish kerak, Ronald 2018—2020-yillarda ham terma jamoani boshqargan. Niderlandiya uning qo‘l ostida 2019-yilning yozida Millatlar Ligasi finaliga qadar yetib borgan. O‘shanda jamoa hal qiluvchi bahsda Portugaliyaga 0:1 hisobida mag‘lub bo‘lgandi.
Eslatib o‘tamiz, Kuman 2020-yilning avgustida “Barselona” bosh murabbiyi etib tayinlangandi. 2020/2021-yilgi mavsumda katalon klubi Ispaniya Kubogida g‘alaba qozondi, La Ligada esa 3-o‘rinni egalladi. Klub rahbariyati uni 2021-yilning 28-oktabrida jamoa “Rayo Valekano”ga 0:1 hisobida mag‘lub bo‘lganidan so‘ng iste’foga chiqargan.
Izoh (0)