Рональд Куман 2023 йил 1 январдан бошлаб Нидерландия терма жамоаси бош мураббийига айланади. Бу ҳақида Нидерландия футбол уюшмаси матбуот хизмати маълум қилди.
«Барселона»нинг собиқ мураббийи Куман ноябрь—декабрь ойларида Қатарда бўлиб ўтадиган ЖЧ—2022 мусобақасидан сўнг терма жамоани қабул қилиб олади.
59 ёшли мутахассис Нидерландия футбол уюшмаслиги билан 2026 йилга қадар мўлжалланган шартномага имзо чекди.
Айни вақтда Нидерландия терма жамоасига Луи ван Гал устозлик қилмоқда. Аввалроқ 70 ёшли мутахассис саратонга чалингани ва касаллик билан курашаётгани хабар қилинганди.
Қайд этиш керак, Роналд 2018—2020 йилларда ҳам терма жамоани бошқарган. Нидерландия унинг қўл остида 2019 йилнинг ёзида Миллатлар Лигаси финалига қадар етиб борган. Ўшанда жамоа ҳал қилувчи баҳсда Португалияга 0:1 ҳисобида мағлуб бўлганди.
Эслатиб ўтамиз, Куман 2020 йилнинг августида «Барселона» бош мураббийи этиб тайинланганди. 2020/2021 йилги мавсумда каталон клуби Испания Кубогида ғалаба қозонди, Ла Лигада эса 3-ўринни эгаллади. Клуб раҳбарияти уни 2021 йилнинг 28 октябрида жамоа «Раё Валекано»га 0:1 ҳисобида мағлуб бўлганидан сўнг истеъфога чиқарган.
Изоҳ (0)