Namangan viloyatining Kosonsoy tumanida istiqomat qiluvchi Yusupovlar xonadonida uch o‘g‘il egizak dunyoga keldi. Bu haqda “Daryo” muxbiri Azizbek Abduvaliyev xabar bermoqda.
Egizaklar Namangan shahridagi tug‘uruq kompleksida tug‘ildi. Ularning ikkisi 2,4 kilogramm, uchinchisi 2 kilogramm vazn bilan dunyo yuzini ko‘rdi.
“Uch egizakka homilador ekanimni bilardim, lekin o‘g‘il yoki qizligidan bexabar edik. Uch o‘g‘il haqiqiy syurpriz bo‘ldi. 27-mart kuni chaqaloqlar tug‘ilishdi, oradan bir hafta o‘tib bizga javob berishdi. Hozir, ko‘z tegmasin, holatimiz yaxshi, suyunchilab kelayotgan mehmonlarni kuzatish bilan bandmiz”, — deydi egizaklarning onasi, 27 yashar Muhayyo Murodullayeva.
2012-yilda turmush qurgan, Kosonsoy tumanining Chindovul qishlog‘idagi “Shirinbuloq” mahallasida yashovchi Alimardon Yusupov va Muhayyo Murodullayeva oilasida 6 yashar Azizbek va 4 yoshli Mushtariybonu voyaga yetayotgan edi. Endi ularning safiga Muhammadyusuf, Muhammadali va Muhammadsodiq qo‘shildi.
Izoh (0)