Наманган вилоятининг Косонсой туманида истиқомат қилувчи Юсуповлар хонадонида уч ўғил эгизак дунёга келди. Бу ҳақда «Дарё» мухбири Азизбек Абдувалиев хабар бермоқда.
Эгизаклар Наманган шаҳридаги туғуруқ комплексида туғилди. Уларнинг иккиси 2,4 килограмм, учинчиси 2 килограмм вазн билан дунё юзини кўрди.
«Уч эгизакка ҳомиладор эканимни билардим, лекин ўғил ёки қизлигидан бехабар эдик. Уч ўғил ҳақиқий сюрприз бўлди. 27 март куни чақалоқлар туғилишди, орадан бир ҳафта ўтиб бизга жавоб беришди. Ҳозир, кўз тегмасин, ҳолатимиз яхши, суюнчилаб келаётган меҳмонларни кузатиш билан бандмиз», — дейди эгизакларнинг онаси, 27 яшар Муҳайё Муродуллаева.
2012 йилда турмуш қурган, Косонсой туманининг Чиндовул қишлоғидаги «Ширинбулоқ» маҳалласида яшовчи Алимардон Юсупов ва Муҳайё Муродуллаева оиласида 6 яшар Азизбек ва 4 ёшли Муштарийбону вояга етаётган эди. Энди уларнинг сафига Муҳаммадюсуф, Муҳаммадали ва Муҳаммадсодиқ қўшилди.
