Jizzaxda xizmat avtomobili uchun 128 mln so‘m ajratildi. 4 kun avval prezident davlat tashkilotlariga bu kabi xarajatlarni taqiqlagandi

Telegram’dagi “Davletovuz” kanalida Jizzax viloyati Tibbiy-ijtimoiy xizmatlarni rivojlantirish boshqarmasiga Cobalt xizmat mashinasi xarid qilish uchun qo‘shimcha mablag‘ ajratilgani to‘g‘risida xabar e’lon qilindi. Viloyat Kengashi kotibiyati holatga munosabat bildirdi.

Gap shundaki, Shavkat Mirziyoyev 31-mart kuni makroiqtisodiy barqarorlikni ta’minlash, aholi farovonligini oshirish masalalari yuzasidan videoselektor o‘tkazgan. Unda davlat rahbari yil yakuniga qadar barcha hokimlik, vazirlik va idoralarga:

• moliyaviy manbasi aniq bo‘lmagan qurilishlarni boshlash;
• bino ta’mirlash, avtomobil, mebel, ofis anjomlari xarid qilish kabi qo‘shimcha xarajatlarni amalga oshirishni qat’iyan taqiqlagandi.

Jizzax viloyati Kotibiyat kengashining qayd etishicha, mahalliy budjetining erkin qoldiq va daromadlar rejasining oshirib bajarilgan qismidan viloyat Tibbiy-ijtimoiy xizmatlarni rivojlantirish boshqarmasiga xizmat avtomashinasi xarid qilish uchun qo‘shimcha 128 million 645 ming so‘m mablag‘ ajratish to‘g‘risidagi qaror prezident va Vazirlar Mahkamasiga qaror va nizomlariga asosan, 2022-yilning 26-mart sanasida, prezident topshirig‘idan 5 kun avval Xalq deputatlari Jizzax viloyat Kengashining 34-sessiyasiga kiritilib, deputatlar tomonidan ma’qullangan.

Qaror 2-aprel kuni chiqarilishiga hujjat barcha mas’ullar kelishuvidan keyin imzolanib, “e-qaror” elektron tizimiga kiritilgani sabab bo‘lgan.

Avvalroq Ekologiya va atrof-muhitni muhofaza qilish davlat qo‘mitasi xizmat mashina parkiga 10 dona elektromobil xarid qilgandi. “Kelajakda qo‘mitaning barcha xizmat mashinalarini elektromobillarga almashtirish va ularni muqobil energiya manbalari hisobidan quvvatlash tizimini joriy qilish rejalashtirilgan”, — deyiladi xabarda.

Eslatib o‘tamiz, Iqtisodiy taraqqiyot va kambag‘allikni qisqartirish vazirligi “Elektromobillar ishlab chiqarish va ulardan foydalanishni tashkil etishni qo‘llab-quvvatlash choralari to‘g‘risida”gi prezident qarori loyihasini muhokamaga qo‘ygandi. Unga ko‘ra, vazirliklar, idoralar, budjet tashkilotlari, mahalliy hokimiyat organlari hamda ustav kapitalida davlat ulushi 50 foizdan ortiq bo‘lgan korxonalar xizmat avtomobillari parkining 2025-yilga qadar kamida 10 foizigacha, 2030-yilga qadar 100 foizi bosqichma-bosqich elektromobillarga almashtiriladi.