Aktyor va rejissor Hilol Nasimov “Daryo” internet-nashriga bergan intervyusida uni islomofobiyada ayblaydiganlarga o‘z munosabatini bildirdi.
“Meni tanqid qilayotganlarning ko‘pchiligi islom dini nazariyasini bilmaydi”— Bu dunyoda hammaga birdek yoqish qiyin. Bitta filmni yuzta tomoshabin ko‘rsa, ularning fikri bir-biriga o‘xshamasligi ham ayni haqiqat. Men filmlarim orqali islom diniga qarshi chiqmayman, aksincha muqaddas dinimizga yot g‘oyalarni qo‘shmoqchi bo‘lganlarning asl yuzini ko‘rsatishga intilaman. Shu bilan birga, davlat siyosatini ham imkon qadar yoritishga harakat qilaman. Hayotda ro‘mol o‘ramagan bo‘lsa-da, iymonli ayollarni juda ko‘p ko‘rganman. Afsuski, ba’zi bir ro‘molga burkangan ayollar nima ish qilishayotganini ham o‘z ko‘zim bilan ko‘rgan vaqtlarim bo‘lgan.
O‘g‘lim ham soqol o‘stirib yuradi, “ol” deb jahlim chiqadi. Shukrki, farzandlarimning bari besh mahal namoz o‘qishadi. Ularning bari iymonli, e’tiqodli farzandlar ekanligidan quvonaman. Shu bois meni dinga qarshilikda ayblash noo‘rin. Ba’zi odamlar film g‘oyasini tushunmay, bir yoqlama fikrlashadi.
Eng qizig‘i, meni tanqid qilayotganlarning ko‘pchiligi islom dini nazariyasini bilishmaydi. Birorta savol bersangiz, labini tishlab qoladi.
Dunyoda islom dinidek muqaddas va ezgulikka xizmat qiladigani yo‘q. Hatto dinimiz g‘ayridin qo‘shnisi harom qilingan hayvonni boqayotgan bo‘lsa ham, unga ozor bermaslikka chaqiradi. Men filmlarimda qoralayotgan personajlar esa odamlarga ziyon yetkazishadi.
Internetda bir aktyor “Hilol Nasimov o‘lsa, janozasiga bormayman”, debdi. Mayli, kelmasin. (Rejissor aktyor Habibullo Nizomovning o‘zi haqida aytgan gaplarini nazarda tutyapti). Odamlar to‘g‘ri tushunishlarini istayman, men real voqealar asosida film suratga olaman. Film qahramonlarimning prototipi bilan hayotda uchrashganman, ularning hikoyasi asosida ssenariy yozganman.
“Filmlarim qahramonlarining prototiplari hayotda bor”
— Masalan, “Tubanlik” filmini olaylik. Filmni suratga olishdan avval bir necha marta Andijonda 11-13 yoshli qizlarni ota-onasining roziligi bilan turmushga berishgani va nikoh kechasida ularning ayrimlari vafot etgani haqida eshitganman. Film orqali nafaqat qizlarni erta turmushga berish, balki ahmoqona qo‘shxotinlikni ham qoralab chiqishni niyat qilgandim.
Mayli, bu voqealar Andijonda bo‘lgandir deymiz, ammo “Tubanlik” filmidagi qahramon prototipi Toshkentda yashaganiga nima deymiz? Men avvalgi yillardagi emas, balki shu kecha-kunduzda sodir bo‘lgan voqealar haqida gapiryapman. Mirza Azizov o‘sha paytda 50 yoshda edi, film prototipi esa 72 yoshda bo‘lgan. Film to‘liq real voqea asosida suratga olingan. Mirza Azizovdan avval Erkin Komilovni fotoprobaga chaqirgandim. Aktyor voqelikni eshitib, hayratga tushgandi.
Ba’zan o‘zbek tilidagi gapini ham o‘nta xato bilan yozadigan va filmlarimdan ayb izlaydigan insonlar g‘ashimni keltiradi. Menimcha, ular film prototiplari hayotda borligi va bunday voqealar tez-tez sodir bo‘lishini bilishsa, filmlarga qarash ham biroz o‘zgargan bo‘lardi.
“Islom dini va chin musulmonlarga hech qanday qarshiligim yo‘q”
— Meni islom diniga qarshilikda ayblayotganlarga yana bir gap: “Ajal jodusi” filmidagi yigitning prototipi bilan ham bir necha marta suhbatda bo‘lganman. U o‘sha paytda Ichki ishlar vazirligining yerto‘ladagi hibsxonasida saqlanardi. Uning aytganlari filmda ko‘rsatilganlaridan o‘n barobar qo‘rqinchliroq edi. Ota-onasi bozorda ishlagan va tong otmasdan ishda ketgan. Internetdagi “mehribon”lar esa uni avray boshlashgan. Baytulmolga pul to‘plash kerak deb odamlarning uyini tunashgan. Yuqorida aytganimdek, asl musulmon inson g‘ayridin qo‘shnisining harom qilingan jonzotiga ozor bermaydi. Dinni niqob qilganlar esa tirik insonlarning joniga ozor berib, molini tunaydi.
Yana bir yigit bilan suhbatlashdim. Otasi vokzal bekatining boshlig‘i, onasi esa stomatolog ekan. Hatto ular ham farzandidagi o‘zgarishlarni sezishmagan. Bolam namoz o‘qiyapti, deb o‘ylashgan, xolos. U yigitning ayoli uch oy avval farzandli bo‘lgan ekan. O‘sha payt ro‘za oyi edi. Bola yerto‘ladagi hibsxonada chirqirab yig‘layapti. Ammo onasi qornini to‘ydirmayapti. Ey, baraka topgur, islom dinida emizikli bolani och qoldirib, ro‘za tutinglar, deyishmagan dedim. Unday aqidalarga berilgan insonlarning miyasi aynib qoladi, ular islom dini amallarini bajaryapmiz, deyishadi. Ammo aks ish tushunishmaydi.
Aslida bolaga 10 barobar kam pul berib, 10 barobar ko‘proq e’tibor qaratish kerak. Yot g‘oyalarga berilish ko‘p hollarda ota-onaning befarqligi sabab yuzaga keladi. Bolaning oyog‘iga xorijning etigini olib bergan yoki yaxshi mashina olib bergan bilan ish bitmaydi. Yuqorida misol keltirgan insonlar yot g‘oyalarga berilib, bor-yo‘g‘idan ham ayrilishgan.
Bolaligimda buvim rahmatli tanchalariga o‘tkazib, suralar yodlatardi. Nima yaxshi-yu, nima yomonligini tushuntirardi. O‘sha paytda o‘rganganlarim haligacha yodimdan chiqmaydi.Xullas, men filmlarimda yot g‘oyalarni tatbiq qilayotgan insonlarni ko‘rsataman. Islom dini va chin musulmonlarga hech qanday qarshiligim yo‘q. Alhamdulilloh, men ham musulmonman.
Rejissor bilan suhbatni quyida to‘liq tomosha qilishingiz mumkin:
Izoh (0)