Davlat test markazi Adliya vazirligi va Bosh prokuratura bilan hamkorlikda taqiqlangan vositalardan foydalangan abituriyentlarni bir necha yilga imtihonlar qatnashish imkoniyatidan chetlatish masalasida ish olib bormoqda. Bu haqda DTM mutasaddilari ishtirokida bo‘lib o‘tgan matbuot anjumanida ma’lumot berildi.
DTM direktori Majid Karimovning so‘zlariga ko‘ra, kirish imtihonlarida tartibni buzgan, taqiqlangan vositalardan foydalangan abituriyentlar imtihondan chetlashtiriladi. Agar bunday xatolik nazoratchilar tomonidan qilinsa, ular ham chetlashtiriladi.
“DTMda qoida buzgan nazoratchilarning ro‘yxati bor. Har yili imtihonda nazoratchi bo‘lish uchun o‘qituvchilar ro‘yxati so‘raladi. Agar ular oldingi yillarda qoida buzgan bo‘lsa, bunday shaxs nazoratchilikka qo‘yilmaydi. Lekin abituriyentlarga kelganda, hozircha hech qanday chora ko‘ra olmaymiz. Hozirgi kundagi biror qonunchilik hujjatlarida chora ko‘rishimiz belgilanmagan”, — deydi DTM direktori Majid Karimov.
U abituriyentlar imtihonga kiritishda barmoq izi, feys-kontrol orqali tekshirilishi va shu orqali oldinlari imtihondan chetlashtirilgan abituriyentlar qattiq nazoratga olinishini ta’kdilagan.
“Adliya vazirligi va Bosh prokuratura bilan abituriyentlarning imtihonda qatnashishini cheklash masalasida ish olib boryapmiz. Bu borada xalqaro tajriba ham o‘rganilgan. Tartibni buzgan abituriyentlar 5—7 yilgacha umuman qabul imtihonida ishtirok etmasligi, agar OTMda o‘qisa, talabalikdan chetlashtirish masalasini normativ-huquqiy jihatdan qonuniylashtirish yo‘llarini ko‘rib chiqyapmiz”, — deydi Majid Karimov.
Izoh (0)