Давлат тест маркази Адлия вазирлиги ва Бош прокуратура билан ҳамкорликда тақиқланган воситалардан фойдаланган абитуриентларни бир неча йилга имтиҳонлар қатнашиш имкониятидан четлатиш масаласида иш олиб бормоқда. Бу ҳақда ДТМ мутасаддилари иштирокида бўлиб ўтган матбуот анжуманида маълумот берилди.
ДТМ директори Мажид Каримовнинг сўзларига кўра, кириш имтиҳонларида тартибни бузган, тақиқланган воситалардан фойдаланган абитуриентлар имтиҳондан четлаштирилади. Агар бундай хатолик назоратчилар томонидан қилинса, улар ҳам четлаштирилади.
«ДТМда қоида бузган назоратчиларнинг рўйхати бор. Ҳар йили имтиҳонда назоратчи бўлиш учун ўқитувчилар рўйхати сўралади. Агар улар олдинги йилларда қоида бузган бўлса, бундай шахс назоратчиликка қўйилмайди. Лекин абитуриентларга келганда, ҳозирча ҳеч қандай чора кўра олмаймиз. Ҳозирги кундаги бирор қонунчилик ҳужжатларида чора кўришимиз белгиланмаган», — дейди ДТМ директори Мажид Каримов.
У абитуриентлар имтиҳонга киритишда бармоқ изи, фейс-контрол орқали текширилиши ва шу орқали олдинлари имтиҳондан четлаштирилган абитуриентлар қаттиқ назоратга олинишини таъкдилаган.
«Адлия вазирлиги ва Бош прокуратура билан абитуриентларнинг имтиҳонда қатнашишини чеклаш масаласида иш олиб боряпмиз. Бу борада халқаро тажриба ҳам ўрганилган. Тартибни бузган абитуриентлар 5—7 йилгача умуман қабул имтиҳонида иштирок этмаслиги, агар ОТМда ўқиса, талабаликдан четлаштириш масаласини норматив-ҳуқуқий жиҳатдан қонунийлаштириш йўлларини кўриб чиқяпмиз», — дейди Мажид Каримов.
Изоҳ (0)