Shveysariya kompaniyasi O‘zbekistonga suvni viruslardan 99 foizgacha tozalaydigan texnologiyalarni taklif qildi

Ekologiya va atrof-muhitni muhofaza qilish davlat qo‘mitasida Davlat ekologiya qo‘mitasi raisi Narzullo Oblomurodov va SymbioSwiss kompaniyasi (Shveysariya)ning ijrochi raisi K.Begle o‘rtasida uchrashuv bo‘lib o‘tdi. Bu haqda qo‘mita axborot xizmati xabar qildi.

Qayd etilishicha, SymbioSwiss kompaniyasi ijrochi raisi O‘zbekistonda amalga oshirilayotgan ishlar o‘z samarasini berayotganini, xususan, Birinchi Toshkent xalqaro investitsiya forumi yuqori saviyada tashkil etilganini qayd etgan. Uchrashuvda Davlat ekologiya qo‘mitasi va SymbioSwiss kompaniyasi o‘rtasida hamkorlikni samarali yo‘lga qo‘yishga alohida e’tibor qaratilgan. Bu hamkorlik jarayonida Shveysariya kompaniyasi arzon, ekologik toza suvni tozalashning eng yangi texnologiyalarini taqdim etish bo‘yicha o‘z takliflarini bergan.

Aytilishicha, ushbu texnologiyalar elektroliz orqali suvni 99,99 foizgacha viruslardan, shu jumladan, COVID-19, bakteriyalar va boshqalardan tozalaydi, ulardan foydalanish uchun faqat suv, tuz va elektr energiyasi kerak bo‘ladi. Mahsulot kimyoviy ishlovdan ko‘ra arzonroq va ekologik tozaligi bilan muhim ahamiyatga ega. Uskunalardan shifoxonalar, maktablar, bolalar bog‘chalari va mehmonxonalar kabi ijtimoiy obyektlarda samarali foydalanish imkoniyati mavjud.

Shveysariya tomoni ushbu texnologiyalarni joriy etish uchun 10 million dollarlik investitsiya loyihasini amalga oshirish bo‘yicha ham o‘z taklifini bergan. Oblomurodov bildirilgan takliflar uchun minnatdorlik bildirib, loyihani amalga oshirishda hamkorlik qilish imkoniyatlarini belgilangan tartibda kelgusida ko‘rib chiqilishini qayd etgan.

Shuningdek, respublikaning tegishli vazirlik va idoralari, xususan, Investitsiyalar va tashqi savdo, Sog‘liqni saqlash, Innovatsion rivojlanish, Suv xo‘jaligi va boshqa vazirliklar bilan ham hamkorlik imkoniyatlarini ko‘rib chiqish taklif etilgan. Uchrashuv yakunida tomonlar hamkorlikni davom ettirishga ishonch bildirgan.