Экология ва атроф-муҳитни муҳофаза қилиш давлат қўмитасида Давлат экология қўмитаси раиси Нарзулло Обломуродов ва SymbioSwiss компанияси (Швейцария)нинг ижрочи раиси К.Бегле ўртасида учрашув бўлиб ўтди. Бу ҳақда қўмита ахборот хизмати хабар қилди.
Қайд этилишича, SymbioSwiss компанияси ижрочи раиси Ўзбекистонда амалга оширилаётган ишлар ўз самарасини бераётганини, хусусан, Биринчи Тошкент халқаро инвестиция форуми юқори савияда ташкил этилганини қайд этган. Учрашувда Давлат экология қўмитаси ва SymbioSwiss компанияси ўртасида ҳамкорликни самарали йўлга қўйишга алоҳида эътибор қаратилган. Бу ҳамкорлик жараёнида Швейцария компанияси арзон, экологик тоза сувни тозалашнинг энг янги технологияларини тақдим этиш бўйича ўз таклифларини берган.
Айтилишича, ушбу технологиялар электролиз орқали сувни 99,99 фоизгача вируслардан, шу жумладан, COVID-19, бактериялар ва бошқалардан тозалайди, улардан фойдаланиш учун фақат сув, туз ва электр энергияси керак бўлади. Маҳсулот кимёвий ишловдан кўра арзонроқ ва экологик тозалиги билан муҳим аҳамиятга эга. Ускуналардан шифохоналар, мактаблар, болалар боғчалари ва меҳмонхоналар каби ижтимоий объектларда самарали фойдаланиш имконияти мавжуд.
Швейцария томони ушбу технологияларни жорий этиш учун 10 миллион долларлик инвестиция лойиҳасини амалга ошириш бўйича ҳам ўз таклифини берган. Обломуродов билдирилган таклифлар учун миннатдорлик билдириб, лойиҳани амалга оширишда ҳамкорлик қилиш имкониятларини белгиланган тартибда келгусида кўриб чиқилишини қайд этган.
Шунингдек, республиканинг тегишли вазирлик ва идоралари, хусусан, Инвестициялар ва ташқи савдо, Соғлиқни сақлаш, Инновацион ривожланиш, Сув хўжалиги ва бошқа вазирликлар билан ҳам ҳамкорлик имкониятларини кўриб чиқиш таклиф этилган. Учрашув якунида томонлар ҳамкорликни давом эттиришга ишонч билдирган.
Изоҳ (0)