O‘zbekiston tashqi qarzi 2021-yili 39,6 mlrd dollarni tashkil qildi, ya’ni 2020-yil bilan solishtirganda 16 foizga yoki 5,4 mlrd dollarga ko‘proq bo‘ldi. Bu Markaziy bank hisobotida qayd etildi (pdf).
Tashqi qarz davlat hissasiga ham, xususiy sektor hissasiga ham to‘g‘ri keladi. Birinchisi 23,7 mlrd dollarni tashkil qilsa, ikkinchisi – 15,8 mlrd dollar.
Davlat qarzi 11 foizga o‘sdi. Asosiy sabab – jami 3,8 mlrd dollar miqdorda qarz olinishi.
Xususiy sektorniki esa 24 foizga o‘sgan. Uning asosiy qismi kreditlar va bank qarzlari, neft va gaz, energetika va tog‘-kon metallurgiya kompaniyalariga to‘g‘ri keladi.
2021-yilda 919,9 mln dollarlik davlat qarzi yopilgan va 370,9 mln dollarlik foizlar to‘langan.
Xususiy sektor qarzlari bo‘yicha to‘lovlar 4,5 mlrd dollarni tashkil qilib, 523,3 mln dollar foiz ustamalariga to‘g‘ri kelgan.
Avvalroq O‘zbekiston davlat qarzining bir qismi so‘mdagi qarzga o‘girilgani haqida xabar berilgan edi.
Izoh (0)