Avvalroq Rossiya endilikda Yevropa va AQShga gazni faqatgina rublda sotishi haqida xabar berilgan edi. Aniq tartib yaqin vaqt ichida ishlab chiqiladi, biroq Rossiyaning barcha hamkorlari ham yangi shartlarga rozi emas.
Yevropada “Gazprom”ning asosiy hamkorlaridan biri bo‘lgan Avstriyaning OMV kompaniyasi Rossiya gazi uchun valyuta hisob-kitobini o‘zgartirish niyati yo‘qligini bildiradi, deb ma’lum qildi kompaniya bosh direktori Alfred Shtern.
Xabarni OAV orqali ko‘rdim. Bizga hali hech kim qo‘ng‘iroq qilmadi, bizda amaldagi shartnomalar mavjud, unda esa valyuta hisob-kitoblarini o‘zgartirish imkoniyatlari haqida hech qanday bo‘lim yoq, — deydi u.
Shtern, OMV shartnomaga muvofiq “Gazprom” bilan yevroda hisob-kitob qilishda davom ettirishini ta’kidladi:
Bizda boshqa shartnoma asosi yo‘q, bunday ham bo‘lishi mumkin emas.
Polshaning PGNIG va “Gazprom” o‘rtasidagi hisob-kitoblarni o‘z ichiga olgan kelishuv ham valyutani o‘zgartirish imkoniyatini ko‘zda tutmaydi, deydi uning rahbari Pavel Mayevskiy.
“Gazprom” bilan to‘lovlar amalga oshiriladigan shartnomada valyuta o‘zgartirish bo‘yicha hech qanday band keltirilmagan — deydi u.
Litvaning “Gazprom”dan gaz sotib oluvchi “Ignitis grupe” kompaniyasi Rossiya gazidan voz kechisni rejalashtirmoqda, deydi kompaniya vakili Arturas Ketleryus.
Biz “Gazprom”ga to‘lov qilishni rejalashtirmayapmiz, shunday ekan bu biz uchun muhim emas, — deydi u.
Putinning gazni faqat rublda to‘lash haqidagi qarori Germaniya gaz sanoatini chalkashlik domiga tortdi, deydi Zukunft Gas birlashmasi rahbari Timm Keler.
Iqtisodiyot va iqlim vazirligi rahbari, vitse-kansler Robert Xabek jurnalistlarga, hisob-kitoblarni rublda olib borishga qaror qilish Rossiya bilan tuzilgan amaldagi shartnomani buzish deb baholanishini aytgan.
To‘lovlarni rublda amalga oshirish haqidagi qaror shartnomani buzishga kiradi, — deydi Xabek.
Germaniya Rossiya gazi uchun rublda hisob-kitob qilishi mumkin edi, ammo buning uchun u Rossiya Markaziy bankiga qarshi qo‘llangan sanksiyalarni buzishiga to‘g‘ri kelgan bo‘lardi, dedi Iqlim va energetika bundestagi qo‘mitasi rahbari Klaus Ernest.
Ha, xuddi shunday bo‘lishi mumkin edi, ammo Germaniya Rossiya Markaziy bankidan rubl olishga va shu bilan birga, o‘z sanksiyalarini chetlab o‘tishga majbur bo‘lardi. Rublda to‘lash majburiyati, ehtimol, gaz ta’minoti haqidagi shartnomalarning buzilishi deb baholanardi, — deydi Ernest.
24-mart kuni Sloveniya bosh vaziri Yanez Yashna Bryusseldagi Yevropa Ittifoqi rahbarlari sammitida Yevropa Rossiya gazini rublda to‘lamasligini bildirdi.
Yevropada kimdir rubl qanday ko‘rinishda ekanini biladi deb o‘ylamayman, hech kimning rublda to‘lash niyati yo‘q, — dedi u.
“Moldovagaz” kompaniyasi rahbari Vadim Chebanning ma’lum qilishicha, kompaniya 1-maydan boshlab “Gazprom” bilan rublda hisob-kitob qiladi. Cheban Moldaviyada muammo paydo bo‘lmasligiga umid qilmoqda.
“Gazprom”ning sho‘ba korxonasi “Gazprom eksport” o‘zining elektron savdo platformasi orqali G‘arbiy Yevropaga gazni rublda sotishga urinib ko‘rdi, biroq 2021-yili ushbu maydoncha orqali atigi 7,3 mlrd kub metr gaz sotilgan, oktabr oyi o‘rtasidan beri savdo bo‘lmagan.
Izoh (0)