O‘zbekiston yo‘llarida: Nexia piyodaga yo‘l berishi oqibatida 3 ta mashina to‘qnashdi, daraxtga borib urilgan Spark yonib ketdi

So‘nggi kunlarda mamlakat yo‘llarida sodir bo‘lgan yo‘l-transport hodisalari tafsilotlarini taqdim etamiz.

Samarqandda Lacetti urib yuborgan fuqaro voqea joyida halok bo‘ldi

Holat 8-mart kuni tungi soat 01:00 larda Samarqand tumanidagi davlat ahamiyatiga ega M-37A xalqa yo‘lida sodir bo‘lgan. Yo‘lning o‘rtasidagi beton to‘siqdan oshib o‘tayotgan fuqaroni (41 yoshli) katta tezlikda harakatlanib kelayotgan Lacetti haydovchisi (31 yoshli) urib yuborgan.

YTH oqibatida piyoda olgan tan jarohatlari tufayli voqea joyida halok bo‘lgan.

Sirdaryoda YPX xodimining talabiga bo‘ysunmagan haydovchi xizmat mashinasini urib ketdi

Qayd etilishicha, 18-mart kuni olingan tezkor xabar asosida DXX Sirdaryo viloyati boshqarmasi, viloyat IIB JQB va viloyat Bojxona boshqarmasi tezkor xodimlari tomonidan hamkorlikda Sayxunobod tumani hududida tezkor tadbir o‘tkazilgan. Tadbir davomida davlat raqam belgisi yechib qo‘yilgan Lacetti avtomashinasi YPX xodimlari yordamida to‘xtatilish choralari ko‘rilgan vaqtida ushbu haydovchi xodimining qonuniy buyrug‘iga bo‘ysunmagan. U yo‘l chetida to‘xtab turgan YPX xodimlariga biriktirilgan Lacetti xizmat avtomashinasiga shikast yetkazgan. So‘ng YPX maskani yonida joylashgan pastlikka tushib to‘xtagan. Avtomashinada bo‘lgan shaxslar huquqni muhofaza qiluvchi organ xodimlari tomonidan ushlangan.

Avtomashina xolislar ishtirokida ko‘zdan kechirilganda ko‘p miqdordagi tarkibida kuchli ta’sir qiluvchi hamda giyohvandlik moddasi bo‘lgan dori vositalari borligi aniqlanib, daliliy ashyo sifatida olingan.

Hozirda holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.

Toshkentda daraxtga borib urilgan Spark yonib ketdi

Ma’lum qilinishicha, 26-mart kuni soat 22:00 atrofida Toshkent shahri Uchtepa tumani Qovunchi ko‘chasida I.M. (22 yoshli) Spark avtomashinasini boshqarib ketayotib, boshqaruvni yo‘qotgan va yo‘l chetidagi daraxtga borib urilgan. Mashinadagi haydovchi va yo‘lovchini yaqin atrofdagi odamlar mashinadan olib chiqqan. Ko‘p o‘tmay, dvigatelda qisqa tutashuv sodir bo‘lib, yong‘in boshlangan. Holat voqea joyiga yetib kelgan o‘t o‘chiruvchilar tomonidan bartaraf etilgan.

YTH oqibatida haydovchi va yo‘lovchi B.S. tan jarohatlari olib, shifoxonaga yotqizilgan.

Holat yuzasidan Toshkent shahar Ichki ishlar bosh boshqarmasi xodimlari tomonidan tergovga qadar tekshiruv harakatlari o‘tkazilmoqda.

Namanganda Nexia piyodaga yo‘l berishi oqibatida 3 ta mashina to‘qnashdi

Qayd etilishicha, 27-mart soat 19:30 larda Namangan shahar Boburshoh ko‘chasida Yoshlar markazi tomonga harakatlanayotgan Nexia avtomashinasi piyodaga yo‘lning belgilanmagan qismida yo‘l bergan. Shu vaqtda bir yo‘nalishda harakatlanayotgan Matiz avtomashinasi Nexia’ning orqa qismiga kelib urilgan. Zarb oqibatida Matiz qarama-qarshi yo‘nalishga o‘tib, Damas va Lacetti avtomashinalari bilan to‘qnashgan.

YTH oqibatida Matiz avtomashinasi haydovchisi (2000-yilda tug‘ilgan) tan jarohati olgan va shifoxonaga yotqizilgan.

Voqea joyiga YPX xodimlari yetib borib, jarohatlangan haydovchiga yordam ko‘rsatish va yo‘l transport hodisasini rasmiylashtirish ishlarini amalga oshirgan.