Сўнгги кунларда мамлакат йўлларида содир бўлган йўл-транспорт ҳодисалари тафсилотларини тақдим этамиз.
Самарқандда Lacetti уриб юборган фуқаро воқеа жойида ҳалок бўлди
Ҳолат 8 март куни тунги соат 01:00 ларда Самарқанд туманидаги давлат аҳамиятига эга М-37А халқа йўлида содир бўлган. Йўлнинг ўртасидаги бетон тўсиқдан ошиб ўтаётган фуқарони (41 ёшли) катта тезликда ҳаракатланиб келаётган Lacetti ҳайдовчиси (31 ёшли) уриб юборган.
ЙТҲ оқибатида пиёда олган тан жароҳатлари туфайли воқеа жойида ҳалок бўлган.
Сирдарёда ЙПХ ходимининг талабига бўйсунмаган ҳайдовчи хизмат машинасини уриб кетди
Қайд этилишича, 18 март куни олинган тезкор хабар асосида ДХХ Сирдарё вилояти бошқармаси, вилоят ИИБ ЖҚБ ва вилоят Божхона бошқармаси тезкор ходимлари томонидан ҳамкорликда Сайхунобод тумани ҳудудида тезкор тадбир ўтказилган. Тадбир давомида давлат рақам белгиси ечиб қўйилган Lacetti автомашинаси ЙПХ ходимлари ёрдамида тўхтатилиш чоралари кўрилган вақтида ушбу ҳайдовчи ходимининг қонуний буйруғига бўйсунмаган. У йўл четида тўхтаб турган ЙПХ ходимларига бириктирилган Lacetti хизмат автомашинасига шикаст етказган. Сўнг ЙПХ маскани ёнида жойлашган пастликка тушиб тўхтаган. Автомашинада бўлган шахслар ҳуқуқни муҳофаза қилувчи орган ходимлари томонидан ушланган.
Автомашина холислар иштирокида кўздан кечирилганда кўп миқдордаги таркибида кучли таъсир қилувчи ҳамда гиёҳвандлик моддаси бўлган дори воситалари борлиги аниқланиб, далилий ашё сифатида олинган.
Ҳозирда ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Тошкентда дарахтга бориб урилган Spark ёниб кетди
Маълум қилинишича, 26 март куни соат 22:00 атрофида Тошкент шаҳри Учтепа тумани Қовунчи кўчасида I.М. (22 ёшли) Spark автомашинасини бошқариб кетаётиб, бошқарувни йўқотган ва йўл четидаги дарахтга бориб урилган. Машинадаги ҳайдовчи ва йўловчини яқин атрофдаги одамлар машинадан олиб чиққан. Кўп ўтмай, двигателда қисқа туташув содир бўлиб, ёнғин бошланган. Ҳолат воқеа жойига етиб келган ўт ўчирувчилар томонидан бартараф этилган.
ЙТҲ оқибатида ҳайдовчи ва йўловчи Б.С. тан жароҳатлари олиб, шифохонага ётқизилган.
Ҳолат юзасидан Тошкент шаҳар Ички ишлар бош бошқармаси ходимлари томонидан терговга қадар текширув ҳаракатлари ўтказилмоқда.
Наманганда Nexia пиёдага йўл бериши оқибатида 3 та машина тўқнашди
Қайд этилишича, 27 март соат 19:30 ларда Наманган шаҳар Бобуршоҳ кўчасида Ёшлар маркази томонга ҳаракатланаётган Nexia автомашинаси пиёдага йўлнинг белгиланмаган қисмида йўл берган. Шу вақтда бир йўналишда ҳаракатланаётган Matiz автомашинаси Nexia’нинг орқа қисмига келиб урилган. Зарб оқибатида Matiz қарама-қарши йўналишга ўтиб, Damas ва Lacetti автомашиналари билан тўқнашган.
ЙТҲ оқибатида Matiz автомашинаси ҳайдовчиси (2000 йилда туғилган) тан жароҳати олган ва шифохонага ётқизилган.
Воқеа жойига ЙПХ ходимлари етиб бориб, жароҳатланган ҳайдовчига ёрдам кўрсатиш ва йўл транспорт ҳодисасини расмийлаштириш ишларини амалга оширган.
Мавзуга доир:
Изоҳ (0)