Samarqandda 10 gektar yerni 250 ming dollarga sotmoqchi bo‘lgan tadbirkor ushlandi

Samarqand viloyati Nurobod, Jomboy va Urgut tumanlarida katta miqdorda noqonuniy yer sotish holatlariga chek qo‘yildi, deb xabar bermoqda O‘zA.

Qayd etilishicha, Davlat xavfsizlik xizmati Samarqand viloyati boshqarmasi viloyat IIB hamda iqtisodiy jinoyatlarga qarshi kurashish departamenti viloyat boshqarmasi xodimlari bilan hamkorlikda korrupsiyaga qarshi kurashish yo‘nalishida tezkor tadbirlar o‘tkazgan. Natijada Nurobod tumanidagi MCHJ rahbari, Q.Z. (1994-yilda tug‘ilgan) jamiyat tasarrufidagi 10 gektar lalmi yer maydonini 250 ming dollar evaziga mahalliy fuqaroga sotishga kelishib, so‘ralgan pulning 100 ming dollarini olayotgan vaqtida ushlangan.

Yana bir tadbirda Samarqand shahrida yashovchi A.I. (1989-yilda tug‘ilgan) ijara asosida foydalanib kelayotgan Jomboy tumani “Mirza-Pay” irrigatsiya tizimi boshqarmasiga qarashli 1 gektar sug‘oriladigan yer maydonini fuqaroga 60 ming dollari evaziga hokimiyat tizimidagi tanishlari orqali rasmiylashtirib berishni va’da qilgani aniqlangan. U mahalliy fuqarodan 30 ming dollarni olayotgan vaqtida ashyoviy dalillar bilan qo‘lga olingan.

Shuningdek, Urgut tumanidagi MCHJ rahbari X.A. (1964-yilda tug‘ilgan) esa jamiyatga tegishli bo‘lgan 5 sotix yer maydonini mashinalarga xizmat ko‘rsatish markazini tashkil qilish uchun 35 million so‘mga mahalliy fuqaroga sotayotgan vaqtida ushlangan.

Hozirda yuqoridagi shaxslarga nisbatan jinoyat kodeksining tegishli moddalari bilan jinoyat ishlari qo‘zg‘atilgan. Surishtiruv harakatlari olib borilmoqda.