Fermer xo‘jaligi va “Yoshlar mehnat guzari” uchun ajratilgan yer maydonlarini sotmoqchi bo‘lgan firibgarlar ushlandi, deb xabar bermoqda Iqtisodiy jinoyatlarga qarshi kurashish departamenti.
Qayd etilishicha, Bosh prokuratura huzuridagi departament hamda Davlat xavfsizlik xizmatining Jizzax viloyati boshqarmalari tomonidan tezkor tadbir o‘tkazilgan. Unda “H.S.” fermer xo‘jaligi rahbari O.N. xo‘jalikning 20 gektar suvli yer maydonini fuqaro M.ga 230 million so‘mga sotishga kelishgani aniqlangan. U kelishilgan puldan 100 million so‘mni olgan vaqtida ashyoviy dalillar bilan ushlangan.
Bundan tashqari, departamentning Namangan viloyati Kosonsoy tuman bo‘limi tomonidan tezkor tadbir o‘tkazilgan. Unda “Z.M” fermer xo‘jaligi rahbari M.R. xo‘jalikning 1 gektar g‘alla ekin yer maydonini 8 ming dollar evaziga bog‘dorchilik yo‘nalishida fuqaro A.ning nomiga o‘tkazib berishni va’da qilgani aniqlangan. U xizmati evaziga 6 ming 100 dollar va 20 million so‘mni olgan vaqtida ashyoviy dalillar bilan qo‘lga olingan.
Shuningdek, departament hamda DXXning Sirdaryo viloyati boshqarmalari tomonidan tezkor tadbir o‘tkazilgan. Unda muqaddam firibgarlik jinoyati uchun sudlangan fuqaro G‘.K. Mirzaobod tumani hududidan Yoshlar mehnat guzari binosini qurish uchun ajratilgan 40 sotix yer maydonining 6 sotixini fuqaro S.ga 6 ming 600 dollarga sotishga kelishgani aniqlangan. U kelishilgan puldan 4 ming dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining tegishli moddalari bilan jinoyat ishi qo‘zg‘atilgan. Hozirda tergov harakatlari o‘tkazilmoqda.
Mavzuga doir:
- Namanganda o‘zgaga tegishli bog‘dan 4 sotix yerni ajratib berish uchun tanishidan 6 ming dollar olgan shaxs ushlandi
- Navoiyda fuqaro o‘rmon xo‘jaligi hududidan ijaraga olgan 200 gektar yerini sotayotganida ushlandi
- Navoiyda tadbirkorga yer olib berish uchun 140 ming dollar so‘ragan shaxslar ushlandi
Izoh (0)