Ijtimoiy tarmoqlarda bir necha shaxslar tomonidan boshqa fuqarolar “samosud” qilinayotgani, o‘zboshimchalik bilan so‘roqqa tutilayotgani aks etgan videolar tarqaldi. Toshkent shahar IIBB holatga munosabat bildirdi.
Aniqlanishicha, holatlardan biri Bektemir tumanida sodir bo‘lgan. 18-mart kuni 19 yoshli A.R. do‘konlarga xaridor sifatida kirib, xarid qilingan mahsulot uchun to‘lov varaqasi (chek)ni bermagani yuzasidan ushbu do‘konlarning QR-kodini skaner qilib, “Soliq hamkor” sahifasiga yuborgani uchun do‘kon egalari P.S. (1990-yilda tug‘ilgan) va K.F. (1991-yilda tug‘ilgan) tomonidan turli so‘zlar bilan haqorat qilingan.
Bundan tashqari, 20-mart kuni Sergeli tumanida bir necha fuqaro 25 yoshli L.F.ni do‘kon xodimlari xarid qilingan mahsulot uchun to‘lov varaqasi (chek)ni bermagani bo‘yicha ma’lumotlarni soliq idoralariga berayotganlikda ayblagan. So‘ng fuqarolar D.G‘., X.A., U.L., N.N., X.S. va boshqalar L.F.ni turli so‘zlar bilan haqoratlab, shovqin ko‘tarib, jamoat tartibini buzgan.
Hozirda ushbu fuqarolarga nisbatan Ma’muriy javobgarlik to‘g‘risidagi kodeksning 41-modda (haqorat qilish), 183-modda (mayda bezorilik), 200-modda (o‘zboshimchalik)lari bilan ma’muriy bayonnoma rasmiylashtirilgan.
“‘Soliq hamkor’ dasturining ishga tushirilishidan maqsad iste’molchilarning huquqlarini himoya qilishga, tadbirkorlarning qonunga rioya etgan holda ishlashlarini ta’minlashga qaratilgan. Agar tadbirkorlar ularga yuborilgan jarimadan norozi bo‘lsa, soliq idoralariga shikoyat qilishlari mumkin, ularning murojaati o‘rganib chiqilib, qonuniy qaror qabul qilinishi ta’minlanadi”, — deyiladi munosabatda.
2022-yil 1-yanvardan soliq huquqbuzarliklari haqida “Soliq” mobil ilovasining “Soliq hamkor“ bo‘limi orqali xabar bergan fuqarolarga huquqbuzarlardan undirilgan jarima summasining 20 foizi miqdorida mukofot to‘lanishi belgilangan.
Eslatib o‘tamiz, 2021-yilning oktabr oyida prezidentning nazorat-kassa texnikasidan foydalanishni takomillashtirishga doir qarori qabul qilingandi. Hujjat bilan 2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirgan hamda ushbu xaridni soliq organlarining maxsus mobil ilovasida xarid chekining QR-kodi yordamida skanerlash orqali ro‘yxatdan o‘tkazgan jismoniy shaxslarga ularning bank kartalariga oy yakuni bilan xarid summasining 1 foizi respublika budjetidan qaytariladi.
Izoh (0)