Germaniya hukumati yozga borib Rossiyadan import qilinadigan neftni ikki barobar qisqartirish, kuzda esa ko‘mir importini butunlay to‘xtatishni rejalashtirmoqda. Bu haqda mamlakat iqtisodiyot vaziri Robert Xabekka tayanib, “Interfaks” xabar berdi.
“Yozga borib Rossiyadan import qilinadigan neftni ikki barobarga, kuzda esa Rossiyadan ko‘mir import qilishni butunlay to‘xtatishga umid qilyapmiz”, — deydi Xabek.
Uning qo‘shimcha qilishicha, Berlin 2022-yilning yoziga qadar Rossiyadan import qilinayotgan hozirgi iste’mol gaz hajmini 24 foizga qisqartirish vazifasini qo‘ygan. Shu bilan birga, vazirning so‘zlariga ko‘ra, Germaniya Rossiyadan gaz importini 55 foizdan 40 foizgacha, neftni esa 35 foizdan 25 foizgacha qisqartirishga muvaffaq bo‘lgan.
Xabek Rossiyadan import qilinayotgan gazning asosiy qismiga muqobil variant topish mumkinligini va Germaniya 2024-yil o‘rtalarigacha Rossiyadan yonilg‘i importini to‘liq to‘xtatishni rejalashtirmoqda.
Avvalroq Germaniya Qatar bilan gaz bo‘yicha uzoq muddatli hamkorlik to‘g‘risida kelishib olgandi. Bungacha Yevrokomissiya prezidenti Ursula fon der Lyayen Rossiya energiyasidan tezroq voz kechish rejasi tayyorlanayotganini ma’lum qilgandi. “May oyi oxirigacha biz 2027-yilgacha Rossiya gazi, nefti va ko‘miriga qaramlikdan bosqichma-bosqich voz kechish bo‘yicha taklif kiritamiz. Bu zarur milliy va Yevropa resurslari tomonidan qo‘llab-quvvatlanadi”, — degan u. Biroq Yevropaning ayrim yetakchilari, jumladan, Germaniya kansleri Olaf Shols Rossiyadan energiya yetkazib berishni taqiqlashga qarshi chiqqan.
Izoh (0)