Yaponiya Ukrainadagi vaziyat munosabati bilan Rossiyaga qarshi yangi sanksiyalar joriy qilmoqda. Bu haqda mamlakat Tashqi ishlar vazirligi bayonotiga tayanib, “Reuters” xabar berdi.
Bu safar Yaponiya hukumati 25 nafar rossiyalik jismoniy shaxsning aktivlarini muzlatib qo‘yadi va Rossiyaning 81 tashkilotiga mahsulot eksport qilishni taqiqlaydi.
Agentlik ma’lumotlariga ko‘ra, sanksiyalar ro‘yxatiga quyidagilar kiradi: Miass avtomobil zavodi, Vimpel kemasozlik zavodi, Amur kemasozlik zavodi, “Baykal Elektroniks” elektronika ishlab chiqaruvchisi, “Strela” ishlab chiqarish majmuasi, “Zvezda” mashinasozlik zavodi va boshqalar.
Bundan tashqari, bosh vazir Fumio Kisida Yaponiya Rossiyani savdodagi eng qulay davlat maqomidan mahrum qilish, uning raqamli aktivlar yordamida moliyaviy sanksiyalarni chetlab o‘tishga yo‘l qo‘ymaslik choralarini ko‘rishini aytdi.
Avvalroq Yaponiya rossiyaliklarning kapitalini muzlatib, Rossiya fuqarolariga viza berishni taqiqlagan edi. Bundan tashqari, mamlakat rasmiylari Belarus hukumatining yuqori martabali amaldorlariga nisbatan sanksiyalar qo‘llash masalasini ko‘rib chiqmoqda.
Kanada ham Ukrainadagi urush tufayli Rossiya federatsiya kengashining 160 nafar a’zosiga qarshi sanksiyalar joriy qilmoqda.
Rossiya 24-fevralda Ukraina hududida maxsus harbiy operatsiyalarni boshlaganidan keyin YI, AQSH, Buyuk Britaniya, Kanada, Yaponiya, Janubiy Koreya, Avstraliya va boshqa davlatlar rossiyalik biznesmenlar, top-menejerlar, siyosatchilar va amaldorlarga nisbatan bir qator taqiq hamda cheklov paketlarini joriy etgan.
Izoh (0)