Фарғона вилоятида ҳавони ифлослантираётган икки корхона фаолияти вақтинча тўхтатилди

Фарғона вилоятида атмосфера ҳавосига етказилаётган зарар сабаб 2 та корхона фаолияти вақтинча тўхтатилди, деб хабар бермоқда Экология ва  атроф-муҳитни муҳофаза қилиш давлат қўмитаси.

Маълум қилинишича, қўмита вилоятнинг Ўзбекистон тумани Шўрсув шаҳарчасида жойлашган корхоналарнинг табиатни муҳофаза қилиш қонунчилигига риоя этилиши устидан ўрганиш олиб борди.

Ихтисослаштирилган таҳлилий назорат марказининг мобил лабораторияси жалб қилиниб, ҳудуддаги атмосфера ҳавосидан намуналар олиниб, таҳлил ишлари амалга оширилди. Унга кўра, аммиак моддаси 4 та нуқтада 1,5 дан 23,6 мартагача ҳамда водород сулфиди моддаси 2 та нуқтада 3,2 дан 4,6 мартагача белгиланган меъёрлардан ортиқлиги аниқланди.

Ўрганиш якунида цемент ишлаб чиқарувчи «Moдeрнa цемент индастуриес» МЧЖ ҚК ҳамда гипс ишлаб чиқарувчи «Цемент хом ашё савдо» МЧЖда мавжуд чанг-газ тозалаш ускуналари носозлиги туфайли иш фаолияти вақтинча тўхтатилди.

Қайд этилишича, ҳозирда меъёрдан ортиқ чиққан моддаларни ажратиб чиқарувчи корхоналарни аниқлаш, уларда ушбу моддаларни камайтириш чораларини кўриш ишлари олиб борилмоқда.

Экология ва атроф-муҳитни муҳофаза қилиш давлат қўмитаси бошқарма бошлиғи ўринбосари Одилбек Камилбеков сўзларига кўра, республикада атмосфера ҳавосини ифлослантирувчи мингдан ортиқ йирик корхоналар бор. Мавжуд корхона ва ташкилотларда йилига салкам 6,5 миллион тонна ташланмалар ҳосил бўлади. Унинг 5,6 миллион тоннаси чанг-тозалаш ускуналарига йўналтирилади. Шундан 5,5 миллион тоннаси ушлаб қолинади ва зарарсизлантирилади. Улардан 4,6 миллион тоннаси утилизация қилинади.