23 март куни Туркманистоннинг қатор вилоятларида пахта чигитини экиш бошланди. Бу ҳақда «Туркменистан сегодня» давлат ахборот агентлиги хабар берди.
Телерепортаж кадрларидан кўриш мумкинки, чигит экиш кампанияси янги президенти Сердар Бердимуҳамедовнинг портрети остида амалга оширилган.
Чигит экишни бошлаган агроном ва муллалар қишлоқ хўжалигига ғамхўрлик кўрсатаётган Арқадағ (Гурбангули Бердимуҳамедов) ва янги давлат раҳбарига миннатдорлик билдирган.
Маълум қилинишича, 2022 йилда Туркманистонда 580 минг гектарга чигит экилади, 1,25 миллион тонна пахта ҳосилини йиғиш режалаштирилган. Чигит экиш кампаниясига 1708 та трактор ва сеялка (уруғ экишга мўлжалланган машина), шунингдек, 5517 та пахта култиватори ва бошқа қишлоқ хўжалиги агрегатларидан фойдаланилади. 485 биолаборатория фермерларни пахта зараркунандаларига қарши ишлатиладиган биомаҳсулотлар билан таъминлайди.
Эслатиб ўтамиз, 12 март куни Туркманистонда муддатидан олдинги президентлик сайловлари бўлиб ўтди. Унда собиқ давлат раҳбарининг ўғли Сердар Бердимуҳамедов ғолиб бўлди. Сайлов кампанияси давомида у Туркманистоннинг нейтрал мақомини сақлаб қолиш, шунингдек, яхши қўшничилик муносабатларини ривожлантириш ва халқаро ташкилотлар, хусусан, БМТ билан ҳамкорликни мустаҳкамлашга ваъда берган.
Изоҳ (0)