Buyuk Britaniya hukumati “Chelsi”ga uy o‘yinlariga chipta sotishga ruxsat berdi

Buyuk Britaniya hukumati “Chelsi”ga uy o‘yinlariga chipta sotishga ruxsat berdi. Bu haqda BBC xabar bermoqda.

Qayd etilishicha, rasmiylar klubga chipta sotishni taqiqlaydigan va o‘yinlarga faqat abonement egalari tashrif buyurishi ko‘zda tutilgan litsenziyasini yangilagan.

Endilikda muxlislar chiptalarni sotib olishi mumkin bo‘ladi, ammo sotuvdan tushgan mablag‘ga Premyer Liga ega chiqadi. Liga esa daromadlarni xayriya tashkilotlariga yo‘naltiradi.

Keyinroq liga vakillari London klubi rahbariyati bilan maslahatlashgan holda qaysi tashkilotlarga moliyaviy yordam ko‘rsatilishini hal qiladi.

Eslatib o‘tamiz, 27-fevral kuni Abramovich Ukrainadagi vaziyat tufayli “Chelsi” boshqaruvini klub xayriya fondiga topshirdi. 3-mart kuni esa 2003-yildan beri boshqarib kelayotgan jamoasini sotishga qaror qilganini ma’lum qildi.

Abramovichga nisbatan qo‘llangan sanksiyalar tufayli “Chelsi” o‘y o‘yinlarga chipta sotish huquqidan mahrum qilindi. Shundan so‘ng klubning bosh homiysi jamoa bilan hamkorlikni to‘xtatdi. Bundan tashqari, “Chelsi”ning bank hisoblari ham muzlatildi. Keyinchalik klub Buyuk Britaniya hukumatini joriy cheklovlar ostida mavsumni yakunlay olmasligi mumkinligi haqida ogohlantirdi.

“Chelsi” Angliya chempionatida 28 ta o‘yin o‘tkazgan holda 59 ochko bilan 3-o‘rinda bormoqda. Jamoa 2-pog‘onadagi “Liverpul”dan 10, peshqadam “Manchester Siti”dan esa 11 ochkoga ortda qolmoqda.