Буюк Британия ҳукумати «Челси»га уй ўйинларига чипта сотишга рухсат берди. Бу ҳақда BBC хабар бермоқда.
Қайд этилишича, расмийлар клубга чипта сотишни тақиқлайдиган ва ўйинларга фақат абонемент эгалари ташриф буюриши кўзда тутилган лицензиясини янгилаган.
Эндиликда мухлислар чипталарни сотиб олиши мумкин бўлади, аммо сотувдан тушган маблағга Премьер Лига эга чиқади. Лига эса даромадларни хайрия ташкилотларига йўналтиради.
Кейинроқ лига вакиллари Лондон клуби раҳбарияти билан маслаҳатлашган ҳолда қайси ташкилотларга молиявий ёрдам кўрсатилишини ҳал қилади.
Эслатиб ўтамиз, 27 февраль куни Абрамович Украинадаги вазият туфайли «Челси» бошқарувини клуб хайрия фондига топширди. 3 март куни эса 2003 йилдан бери бошқариб келаётган жамоасини сотишга қарор қилганини маълум қилди.
Абрамовичга нисбатан қўлланган санкциялар туфайли «Челси» ўй ўйинларга чипта сотиш ҳуқуқидан маҳрум қилинди. Шундан сўнг клубнинг бош ҳомийси жамоа билан ҳамкорликни тўхтатди. Бундан ташқари, «Челси»нинг банк ҳисоблари ҳам музлатилди. Кейинчалик клуб Буюк Британия ҳукуматини жорий чекловлар остида мавсумни якунлай олмаслиги мумкинлиги ҳақида огоҳлантирди.
«Челси» Англия чемпионатида 28 та ўйин ўтказган ҳолда 59 очко билан 3-ўринда бормоқда. Жамоа 2-поғонадаги «Ливерпуль»дан 10, пешқадам «Манчестер Сити»дан эса 11 очкога ортда қолмоқда.
Мавзуга доир: Роман Абрамович турк клубини сотиб олиши мумкин
Изоҳ (0)