“Ularning fikri tinglanmoqda. Ammo ozchilik baribir ozchilik-da”. Kreml Ukrainadagi urushga qarshi rossiyaliklar haqida

Kreml rossiyaliklarning aksariyati Ukrainadagi “maxsus harbiy operatsiya” va Vladimir Putinning harakatlarini qo‘llab-quvvatlayotganini “mutlaqo inkor etib bo‘lmaydigan fakt” deb hisoblaydi. Bunga qarshilarga jangovar harakatlarning maqsadi va sabablari tushuntiriladi, dedi Rossiya prezidentining matbuot kotibi Dmitriy Peskov jurnalistlarga bergan intervyusida.

Fuqarolarning aksariyati, 75 foizdan ortig‘i operatsiyani, Rossiya prezidentining harakatlarini qo‘llab-quvvatlamoqda. Bu mutlaqo inkor etib bo‘lmaydigan fakt. Ko‘rib turibsizki, bu operatsiyaning maqsad va vazifalari, ushbu operatsiyani o‘tkazish sabablari juda faol tushuntirilmoqda, bundan norozilar esa nimalar bo‘layotganini tushunib yetishiga umid qilamiz. Bundan tashqari, qarshilar sodir bo‘layotgan voqealar haqida G‘arbdan kelayotgan yolg‘onlar oqimidan sergak bo‘lishni boshlashi va yangiliklarda berilayotganlarning hammasi ham haqiqat emasligini tushunishi juda muhim, — dedi Peskov.