Finlyandiya Bojxona xizmati sanksiyalarga uchragan rossiyaliklarga tegishli ekani aytilayotgan 21 ta yaxtani ushlab qoldi, deb xabar beradi Helsingin Sanomat gazetasi.
Reuters agentligining yozishicha, Gibraltarda milliarder Dmitriy Pumpyanskiy tegishli ekani taxmin qilinayotgan Axioma yaxtasi ushlangan.
Ma’lum qilinishicha, agarda yaxtalar sanksiyalarga uchragan shaxslarga ekani tasdiqlansa, Finlyandiya hukumati ushbu mol-mulklarni “muzlatish” masalasini ko‘rib chiqadi.
Agentlikning xabar berishicha, Axioma yaxtasi Gibraltarda Malta bayrog‘i ostida prichalga bog‘lab qo‘yilgan. Refinitiv ma’lumotlariga ko‘ra, yaxta 27-fevral kuni Karib dengizidagi Antiua orolini tark etib, Atlantikani kesib o‘tgan va 21-mart kuni Gibraltarga yetib kelgan.
Yevropa Ittifoqi, Buyuk Britaniya, AQSH va boshqa davlatlar tomonidan sanksiyalar joriy etilgach, Yevropada rossiyalik biznesmenlarning mol-mulklari va yaxtalari ushlab qolinmoqda. Bloomberg agentligi ma’lumotlariga ko‘ra, so‘nggi kunlarda Italiyaning o‘zida rossiyaliklarning 780 million yevrolik aktivlari “muzlatilgan”.
Avvalroq Yevropa Ittifoqi tomonidan Rossiyaga qarshi joriy etilgan sanksiyalar ro‘yxatiga USM Holdings asoschisi Alisher Usmonov ham kiritilgani xabar qilingandi. Mart boshlarida Usmonovning “Dilbar” yaxtasi xatlovga olingan. Keyinroq superyaxta Yevropa Ittifoqi va AQSH sanksiyalaridan keyin ekipaj xodimlarini, jumladan, yaxta kapitanini ishdan bo‘shatgan va kema Gamburgda qolib ketadigan bo‘lgan edi.
Izoh (0)