Aleksey Navalniy firibgarlik va sudyani haqorat qilishda aybdor deb topilib, 9 yillik koloniyaga hukm qilindi
Moskvaning Lefortovo sudi 22-mart kuni rossiyalik muxolifatchi Aleksey Navalniyni firibgarlik ishida aybdor deb topdi. Bu haqda “TASS” xabar berdi.
“Navalniy firibgarlik sodir etdi, ya’ni aldov yo‘li bilan o‘zganing mulkiga ega chiqdi”, — deydi sudya Margarita Kotova.
Shuningdek, sud Aleksey Navalniyni sudyani haqorat qilishda ham aybdor deb topgan. “Navalniy sudga ochiqdan ochiq hurmatsizlik ko‘rsatadigan xatti-harakatlarni amalga oshirdi”, — deydi u.
Vladimir viloyatining Pokrov shahridagi koloniyada o‘tkazilgan ko‘chma sud yig‘ilishida Navalniyga nisbatan hukm e’lon qilindi: u to‘qqiz yilga og‘ir rejimdagi koloniyaga hukm qilindi, shuningdek, 1,2 million rubl (11,4 ming dollar) miqdorida jarimaga tortildi.
Avvalroq, munozaralar davomida davlat ayblovchisi Navalniyni 13 yillik koloniyaga hukm qilish va 1,2 million rubl miqdorida jarimaga tortishni so‘ragan edi.
Navalniyga nisbatan firibgarlik ishi 2020-yilning oxirida ochilgan. Tergov qo‘mitasining ma’lum qilishicha, Navalniy turli fondlarga, jumladan Korrupsiyaga qarshi kurashish fondiga o‘tkazilgan 588 million rublning 356 millionini shaxsiy maqsadlarda sarflagan. Sudga hurmatsizlik ishi esa Navalniy ustidan uni faxriyga tuhmat qilishda ayblab o‘tkazilgan boshqa suddan keyin paydo bo‘ldi. Ushbu sud 2021-yilning may oyi oxirida bo‘lib o‘tgan o‘shadi. Ikki ish keyinroq birlashtirilgan.
Ma’lumot uchun, muxolifatchi Aleksey Navalniy 2021-yilning 17-yanvar kuni Rossiyaga Germaniyadan qaytib keldi, u yerda qariyb besh oy davomida bo‘lib, “Novichok” bilan zaharlanganidan keyin davolandi. Tarafdorlari uni kutib olish uchun Vnukovo aeroportiga keldi. U yerda ommaviy hibsga olishlar bo‘lib o‘tdi, Navalniy o‘tirgan samolyot esa Sheremetevoga qayta yo‘naltirildi. Qo‘nganidan keyin siyosatchi qo‘lga olindi — “Iv Roshe” ishi bo‘yicha shartli mahkum majburiyatlarini buzganligi uchun.
18-yanvar kuni Navalniy qamab qo‘yildi, sud esa to‘g‘ridan to‘g‘ri politsiya bo‘limida o‘tkazildi. 19-yanvar kuni Navalniy tomonidan tashkil qilingan Korrupsiyaga qarshi kurash fondi (KKF) “Putinning qasri” haqidagi filmni e’lon qildi. U 100 million martadan ortiq tomosha qilindi, ijtimoiy tarmoqlar esa shu mavzudagi memlarga to‘lib ketdi. Hukumat uning qasr emas, apart-mehmonxona ekanligini va unga Putin emas, balki uning do‘sti Arkadiy Rotenberg egalik qilishini ma’lum qildi.
Navalniyning tarafdorlari butun Rossiya bo‘ylab ommaviy norozilik aksiyalarini uyushtirdi. 23-yanvar kuni to‘rt mingdan ortiq, 31-yanvar kuni besh mingdan ortiq odam hibsga olindi. Ko‘p yillardan buyon bunaqasi bo‘lmagandi. Federal telekanallar “xushmuomala politsiyachilar” haqida hikoya qildi, aslida esa ular namoyishchilarga qarshi dubinka, elektroshoker va ko‘zni yoshlantiruvchi gaz qo‘llagan edi (Kreml buni provokatsiyaga javob deb atadi).
Aksiyalardan keyin kamida 40 ta jinoyat ishi qo‘zg‘atildi. Navalniyning safdoshlari Lyubov Sobol va Kira Yarmish, shuningdek, siyosatchining ukasi Oleg mitingda koronavirusga qarshi choralarni buzganlik uchun uy qamog‘iga hukm qilindi. Navalniyning yana bir safdoshi Leonid Volkov o‘smirlarni ko‘cha aksiyalariga jalb qilganlik uchun qidiruvga berildi.
Moskvaning Simonov tumanlararo sudi 2-fevralda Navalniyni “Iv Roshe” ishi bo‘yicha aybdor deb topib, uning jazoni koloniyada o‘tashi haqida qaror chiqargandi. Moskva shahar sudi 20-fevralda qarorni qonuniy deb topdi va sud hukmi kuchga kirdi.
Navalniy o‘sha hukm bo‘yicha koloniyada 2,5 yillik jazoni o‘tamoqda. 2022-yilning yanvarida u terrorchilar va ekstremistlar reyestriga kiritildi.
