“O‘zbekiston buni qanday boshqargani va nazoratga olganini namuna qilsa arziydi” — Jahon sog‘liqni saqlash tashkilotining O‘zbekistondagi vakili mamlakatda kechgan pandemiya haqida

Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tdi. Unda ishtirok etgan Jahon sog‘liqni saqlash tashkilotining O‘zbekistondagi vakili Lian Kuppens O‘zbekistonda so‘nggi besh yilda tibbiyot sohasidagi o‘zgarishlar haqida gapirdi.

“O‘zbekistondagi faoliyatimni besh yil oldin boshlaganman. Siz saylanganingizdan keyin biroz fursatdan so‘ng bu yerdagi vakolatimni boshladim. Shuning uchun besh yillik kuzatuvlarim bilan o‘rtoqlasha olaman.

Juda ham katta o‘zgarishlar va islohotlar guvohi bo‘ldim. Ayniqsa, bu yerda davolashdan ko‘ra ko‘proq kasallikni oldini olishga urg‘u berilishiga, vertikal boshqaruvdan bevosita gorizontal keng qamrovli yondashuvga asos solinganiga guvoh bo‘ldim.

Yigirma besh yil davomida turli mamlakatlarda vakolatim bo‘yicha ish olib bordim. Shu narsani ochiq-oydin aytishim mumkinki, sizdek shijoatli, yuksak maqsadlarni ko‘zlagan, serg‘ayrat prezidentni ko‘rmadim.

COVID-19 pandemiyasi boshlanganidan keyin sizning bevosita yetakchiligingiz ostida qisqa fursatda pandemiyani nazorat ostiga olishga, salbiy ta’sirini minimal darajaga tushirishga muvaffaq bo‘lindi.

O‘zbekiston buni qanday boshqarganligi, nazoratga olganligi namuna qilsa arziydigan a’lo darajadagi yechimlardir”, – Lian Kuppens.