Ташқи ишлар вазири Абдулазиз Камилов 18 март куни Корея Республикасининг мамлакатдаги Фавқулодда ва мухтор элчиси этиб тайинланган Ким Хи Сангни қабул қилди. Бу ҳақда Ташқи ишлар вазирлиги хабар қилди.
Қайд этилишича, ишонч ёрлиғи нусхасини топшириш маросимидан сўнг вазир элчини Ўзбекистонга тайинлангани муносабати билан табриклаб, масъулиятли фаолиятида муваффақиятлар тилаган. Суҳбат чоғида томонларни қизиқтирган соҳаларда Ўзбекистон—Жанубий Корея махсус стратегик шериклигининг долзарб масалалари муҳокама қилинган.
Олий даражадаги учрашувларда эришилган келишувларни ҳар томонлама амалга ошириш муҳимлиги қайд этилган. Дипломатик муносабатлар ўрнатилганининг 30 йиллиги ва Ўзбекистонда корейс диаспораси ташкил топганининг 85 йиллигини нишонлаш бўйича «Ўзаро алмашинув йили» доирасида бўлиб ўтадиган тадбирлар жадвали кўриб чиқилган.
Шунингдек, ташқи ишлар вазири 18 март куни Доминикана Республикасининг Ўзбекистондаги Фавқулодда ва мухтор элчиси (қароргоҳи Москва шаҳрида) этиб тайинланган Франк Кастелланосни учрашиб, ишонч ёрлиқларини қабул қилиб олган. Вазир эчини лавозимга киришиши билан табриклаган ва масъулиятли вазифасини амалга оширишда муваффақиятлар тилаган.
Суҳбат чоғида сиёсий-дипломатик, савдо-инвестициявий, маданий-гуманитар ва бошқа соҳаларда Ўзбекистон ва Доминикана ҳамкорлигини фаоллаштириш истиқболлари муҳокама қилинган. Томонлар ўртасида БМТ ва Америка давлатлари ташкилоти доирасидаги ҳамкорликни давом эттириш бўйича келишувга эришилган.
Изоҳ (0)