Andijon viloyati Qo‘rg‘ontepa tumanida shaxsiy ma’lumotlarni tarqatmaslik evaziga qiz boladan pul talab qilgan yigit ushlandi. Bu haqda Tergov departamenti xabar qildi.
Qayd etilishicha, 5-mart kuni G‘.G. ismli qiz (16 yoshli) tuman IIB boshlig‘i nomiga ariza bilan murojaat qilgan. Unda o‘ziga tegishli bo‘lgan SIM kartasini yo‘qotib qo‘yganini ma’lum qilgan. Qiz uni topish maqsadida o‘zining telefon raqamiga qo‘ng‘iroq qilganida notanish shaxs ko‘tarib, haqiqatan ham SIM karta hozir o‘zida ekanini va ushbu raqamga ulangan Telegram messenjerini ochib, sir saqlanishi lozim bo‘lgan ma’lumotlarni yuklab olganini bildirgan. Ma’lumotlarni ijtimoiy tarmoqlarda tarqatib yubormaslik uchun 400 ming so‘m pullarni talab qilib kelgan. Fuqaro ushbu shaxsga nisbatan qonuniy chora ko‘rishni so‘ragan.
Arizaga asosan 8-mart kuni tuman IIB Jinoyat qidiruv bo‘limi tezkor xodimlari tomonidan tezkor tadbir o‘tkazilgan. Unda Qo‘rg‘ontepa tumani Ko‘kbuloq ko‘chasida yashovchi Q.A. (25 yoshli) tovlamachilik yo‘li bilan G‘.G.dan talab qilayotgan 400 ming so‘m puldan 200 ming so‘mni olgan vaqtida ushlangan.
Holat bo‘yicha Q.A.ga nisbatan O‘zbekiston Respublikasi Jinoyat kodeksning 165-moddasi 1-qismi (tovlamachilik) bilan jinoyat ishi qo‘zg‘atilgan. Hozirda tergov harakatlari olib borilmoqda.
Ma’lumot uchun, bu turdagi jinoyatlar uchun Jinoyat kodeksi normalariga ko‘ra, 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish jazosi belgilangan.
Mavzuga doir:
- Andijonda bog‘cha mudirasini qo‘rqitib, undan 350 dollar olgan bloger qo‘lga olindi
- Navoiyda mansabdorning xizmat faoliyatiga oid ma’lumotlarini internetda tarqatish bilan tahdid qilgan shaxs qo’lga olindi
- Andijonda o‘zidan 10 yosh katta ayolning suratlarini internetda tarqatmaslik uchun 200 dollar talab qilgan 19 yoshli yigit ushlandi
Izoh (0)