Madaniyat vazirligi huzuridagi Madaniyat va san’atni rivojlantirish jamg‘armasi tashabbusi bilan sahnalashtirilgan “Lazgi — muhabbat va qalb raqsi” balet spektakli 15—16-mart kunlari tomoshabinlarga taqdim etildi.
“Daryo” muxbirining xabar berishicha, Alisher Navoiy nomidagi davlat akademik katta teatrida namoyish etilgan spektakl nemis baletmeysteri Raymondo Rebek tomonidan sahnalashtirilgan.
Madaniyat va san’atni rivojlantirish jamg‘armasi Strategik boshqarma boshlig‘i Elmurod Najimovning ta’kidlashicha, ushbu loyihani yaratish jarayoni 2019-yilda boshlangan bo‘lib, ikki yil davomida ishlar olib borilgan.
“Germaniyalik xoreograf Raymondo Rebek o‘z jamoasi bilan O‘zbekistonga bir necha marotaba tashrif buyurib, “Lazgi” tarixini o‘rgandi, loyiha ustida jiddiy ishladi. Loyihaga taniqli o‘zbek baletmeysteri, O‘zbekiston xalq artisti Gavhar Matyoqubova ham maslahatchi sifatida jalb etildi.
Ushbu loyihaning o‘ziga xosligi shundaki, uni bir qancha davlat ijodkorlari hamkorlikda yaratdi. Masalan, Germaniyadan xoreograf, Yaponiyadan stenograf, Angliyadan ovoz va yorug‘lik uskunalari olib kelindi, Alisher Navoiy nomidagi davlat akademik katta teatri balet truppasi va raqqosalari rollar ijro etdi.
2021-yilning sentabr oyida shu teatrda ushbu milliy balet postanovkasining premyerasi bo‘lib o‘tdi. Shundan so‘ng noyabrda Dubay shahrida o‘tkazilgan “Ekspo—2020” butunjahon ko‘rgazmasi doirasida Dubai Opera sahnasida xalqaro premyera qilindi. “Lazgi — muhabbat va qalb raqsi” Birlashgan Arab Amirliklari hukumati vakillari tomonidan iliq kutib olindi. Ushbu postanovkada milliy va zamonaviy san’atimiz uyg‘unlashgani bois ham tomoshabinlarga manzur bo‘lgani shubhasiz”, — deydi jamg‘arma rasmiysi.
O‘zbekiston xalq artisti Gavhar Matyoqubovaning fikricha, mazkur balet tomoshasi mamlakat an’analarini jahon madaniy arenalarida yoyishga xizmat qiladi.
“O‘zbek san’ati juda ham rang-barang. Yurtimiz maqomlari, baxshilari, milliy raqslari bilan allaqachon dunyoga tanilgan. Hozir yoshim 75 da, 61 yildan buyon san’at olamidaman. Lazgi raqsi uch ming yildan ortiq tarixga ega bo‘lib, 2019-yilda YuNESKO insoniyatning nomoddiy madaniy merosi ro‘yxatiga kiritgan. O‘zbek millatining birinchi baleti “Lazgi” orqali yaratilganidan va mazkur loyihada qatnashganimdan cheksiz xursandman.
Ushbu loyiha tashkilotchilari bo‘lgan Madaniyat va san’atni rivojlantirish jamg‘armasi rahbariyatiga, Saidaxonga san’atkorlar nomidan rahmat aytaman”, — deydi Gavhar Matyoqubova.
Spektakldan so‘ng g‘oya muallifi, O‘zbekiston Respublikasi Madaniyat va san’atni rivojlantirish jamg‘armasi kengashi raisi o‘rinbosari Saida Mirziyoyeva ijodiy jamoa bilan uchrashib, ajoyib namoyish uchun minnatdorlik bildirdi.
“Milliy balet san’atining durdona asari bo‘lgan “Lazgi — muhabbat va qalb raqsi” o‘zbek balet san’atining jahon miqyosiga chiqishida ishonchli qadamidir.
Maqsadimiz — mahorat va iste’dodimiz ila jahon balet maktablari qatorida munosib o‘rin egallash, biz bunga albatta erishamiz. Negaki vatan madaniy merosini jahon hamjamiyatiga ko‘rsatish istagimiz kuchli.
Ushbu betakror spektaklni sahnalashtirish ustida ishlagan butun jamoaga yana bir bor chin qalbdan minnatdorchilik bildiraman”, — deydi Saida Mirziyoyeva.
Loyihaning to‘liq variantini “Daryo”ning YouTube’dagi sahifasi orqali tomosha qilishingiz mumkin.
Mirolim Isajonov
Tasvirchi va montajchi: Ilhom Xursanaliyev
Izoh (0)