Андижон вилояти Қўрғонтепа туманида шахсий маълумотларни тарқатмаслик эвазига қиз боладан пул талаб қилган йигит ушланди. Бу ҳақда Тергов департаменти хабар қилди.
Қайд этилишича, 5 март куни Ғ.Г. исмли қиз (16 ёшли) туман ИИБ бошлиғи номига ариза билан мурожаат қилган. Унда ўзига тегишли бўлган SIM картасини йўқотиб қўйганини маълум қилган. Қиз уни топиш мақсадида ўзининг телефон рақамига қўнғироқ қилганида нотаниш шахс кўтариб, ҳақиқатан ҳам SIM карта ҳозир ўзида эканини ва ушбу рақамга уланган Telegram мессенжерини очиб, сир сақланиши лозим бўлган маълумотларни юклаб олганини билдирган. Маълумотларни ижтимоий тармоқларда тарқатиб юбормаслик учун 400 минг сўм пулларни талаб қилиб келган. Фуқаро ушбу шахсга нисбатан қонуний чора кўришни сўраган.
Аризага асосан 8 март куни туман ИИБ Жиноят қидирув бўлими тезкор ходимлари томонидан тезкор тадбир ўтказилган. Унда Қўрғонтепа тумани Кўкбулоқ кўчасида яшовчи Қ.А. (25 ёшли) товламачилик йўли билан Ғ.Г.дан талаб қилаётган 400 минг сўм пулдан 200 минг сўмни олган вақтида ушланган.
Ҳолат бўйича Қ.А.га нисбатан Ўзбекистон Республикаси Жиноят кодекснинг 165-моддаси 1-қисми (товламачилик) билан жиноят иши қўзғатилган. Ҳозирда тергов ҳаракатлари олиб борилмоқда.
Маълумот учун, бу турдаги жиноятлар учун Жиноят кодекси нормаларига кўра, 3 йилдан 5 йилгача озодликни чеклаш ёхуд 3 йилдан 5 йилгача озодликдан маҳрум қилиш жазоси белгиланган.
Мавзуга доир:
- Андижонда боғча мудирасини қўрқитиб, ундан 350 доллар олган блогер қўлга олинди
- Навоийда мансабдорнинг хизмат фаолиятига оид маълумотларини интернетда тарқатиш билан таҳдид қилган шахс қўлга олинди
- Андижонда ўзидан 10 ёш катта аёлнинг суратларини интернетда тарқатмаслик учун 200 доллар талаб қилган 19 ёшли йигит ушланди
Изоҳ (0)