Xorazm viloyati Shovot tumani hokimligi axborot xizmati Navro‘z bayrami tadbirlarida yupun kiyingan o‘quvchilar jalb etilgani aks etgan suratlarni e’lon qildi (keyinchalik ushbu suratlar o‘chirildi). Xalq ta’limi vazirligi holatga munosabat bildirdi.
Qayd etilishicha, ayni damda suratlardagi holatlarga qaysi maktab rahbariyati tomonidan yo‘l qo‘yilgani o‘rganilmoqda.
“Fursatdan foydalanib boshqa maktablar tegishli xulosa chiqargan holda bunday holatlarga yo‘l qo‘ymasliklari qat’iy talab etiladi”, — deyiladi xabarda.
Eslatib o‘tamiz, 2021-yilning 21-mart kuni ijtimoiy tarmoqlarda Xorazm viloyatining Shovot tumanidagi 35-sonli bog‘chaning ochilish marosimidan olingan suratlar keng jamoatchilik muhokamasiga sabab bo‘lgandi. O‘shanda ham Shovotdagi davlat bog‘chasining ochilish marosimida ishtirok etgan tarbiyalanuvchilar yupun kiyimda bo‘lgani internet foydalanuvchilarining keskin tanqidiga sabab bo‘lgan. Xorazm viloyati XTB holatga munosabat bildirib, “bolalarning yupqa kiyimda tadbirda chiqish qilishiga imkoniyat yaratib bergan xodimlarga tegishli tartibda intizomiy jazo choralari ko‘rilishini” ma’lum qilgandi.
Avvalroq Toshkent viloyatida Qibray tumanidagi tadbirda mehmonlarni kutib olish uchun yupun kiyingan o‘quvchi qizlar jalb etilgani xabar qilingandi.
Mavzuga doir:
Izoh (0)