Samarqand viloyati Past Darg‘om tumani Shakartepa qishlog‘ida yashovchi Sultonbek Hasanov oilasida uch egizak qiz dunyoga keldi. Bu haqda “Daryo”ga viloyat Sog‘liqni saqlash boshqarmasi axborot xizmati ma’lum qildi.
Qizlar Past Darg‘om tuman tibbiyot birlashmasidagi tug‘uruqxonada dunyoga kelgan bo‘lib, egizaklarga Fotima, Zuhra va Zulayho ismlari qo‘yilgan.
Past Darg‘om tuman tibbiyot birlashmasi bosh shifokorining ma’lum qilishicha, hozirda chaqaloqlarning ahvoli yaxshi. Ular shifokorlar nazoratida bo‘lib turibdi.
“Egizaklar operatsiya (kesarcha kesish) yo‘li bilan dunyoga keldi. Ularning kattasi 2,2, keyingisi 2,1 va kichigi 1,8 kilogramm vazn bilan tug‘ildi”, — deydi tuman tibbiyot birlashmasi rahbari Bahrom Sultonov.
Navro‘z bayrami arafasida tuman tibbiyot birlashmasi xodimlari egizaklar holidan xabar olib, bolalarga sovg‘a hamda oziq-ovqat mahsulotlari topshirgan.
Izoh (0)