Shoir Yo‘lchi Ro‘ziyev Yulduz Usmonovadan “Xasta bo‘lma” she’ri uchun 3 yildan buyon qalam haqini ololmayotgani haqida xabar berilgandi. Fuqarolik ishlari bo‘yicha Mirzo Ulug‘bek tumanlararo sudi Yulduz Usmonovadan da’vogar uchun kompensatsiya va tovon puli undirish haqida qaror chiqargan. MIB matbuot xizmatining “Daryo”ga ma’lum qilishicha, hozirgi kunga qadar ijro harakatlari davom ettirish yuzasidan tegishli sud tomonidan ko‘rsatma kelib tushmagan.
Fuqarolik ishlari bo‘yicha Mirzo Ulug‘bek tumanlararo sudining 29-oktabr kuni qabul qilingan hal qiluv qarori bilan da’vo ariza qisman qanoatlantirilib, Yulduz Usmonovadan da’vogar Yo‘lchi Ro‘ziyevga 50 million so‘m ma’naviy zarar uchun kompensatsiya, mazkur da’vo ariza bilan murojaat qilishda to‘langan 1 million 80 ming so‘m miqdorida davlat boji, qonun hujjatlarida belgilangan BHMning 500 baravari miqdorida (135 million so‘m) tovon puli jami 186 million 80 ming so‘m va davlat foydasiga 5 million 400 ming so‘m undirish belgilangan.
Mablag‘larni undirish to‘g‘risidagi ijro varaqasi yuzasidan qarzdor Yulduz Usmonovaga nisbatan ikkita ijro ishi byuroning Mirzo Ulug‘bek tuman bo‘limiga 2022-yil 2-fevralda ijro ishi yurituviga kelib tushgan.
Mazkur ijro varaqlar yuzasidan shu kuni davlat ijrochisi tomonidan qabul qilingan “ijro ishi yuritishni qo‘zg‘atish to‘g‘risida”gi qaroriga muvofiq, ijro ishi talabini ixtiyoriy ravishda bajarish uchun qarzdor Yulduz Usmonovaga 10 kunlik muddat belgilangan.
“Shundan so‘ng, fuqarolik ishlari bo‘yicha Mirzo Ulug‘bek tumanlararo sudi tomonidan ijro ishi vaqtinchalik to‘xtatilgan. Hozirgi kunga qadar ijro harakatlari davom ettirish yuzasidan tegishli sud tomonidan ko‘rsatma kelib tushmagan”, — deyiladi xabarda.
Ta’kidlanishicha, ijro ishini davom ettirish haqida sudning tegishli hujjati kelishi bilan ijro harakatlariga kirishiladi.
Shoir Yo‘lchi Ro‘ziyev O‘zbekiston xalq artisti Yulduz Usmonovaning “Xasta bo‘lma” hamda “Sevgi izhori” qo‘shiqlari matni muallifi hisoblanadi. Yulduz Usmonova “Xasta bo‘lma” qo‘shig‘i matniga qalam haqi sifatida shoirning she’riy to‘plami chop etilishiga ko‘maklashishga va’da bergan. Biroq Yo‘lchi Ro‘ziyev bir necha yillardan buyon san’atkordan she’ri uchun qalam haqini ololmayapti.
Izoh (0)