Bir necha kundan buyon davom etayotgan yog‘ingarchilik oqibatida Andijon viloyatidagi ayrim ko‘chalar, xonadonlar suvga to‘lgan, shuningdek, ayrim ko‘chalarda avtomobillar harakati ma’lum vaqtga cheklangan. “Daryo” yomg‘ir ostidagi Andijon suratlarini jamladi.
Andijon shahar Favqulodda vaziyatlar bo‘limi xodimi Azizbek Yorqulovning aytishicha, 2022-yilning 15-mart kuni kuchli yomg‘ir yog‘ishi sababli, Andijon shahrining bir nechta hududlarida va yo‘l yoqalaridagi ariqlarda suv to‘planishi kuzatilgan. To‘plangan suvlar aholi turar joylari va yo‘l bo‘ylaridagi bino-inshootlarga kirib ketishining oldini olish maqsadida viloyat hokimi — Fuqaro muhofazasi boshlig‘i buyrug‘i bilan ishchi guruh tuzilib, har bir hududga mas’ul shaxslar tayinlangan.
15—16-mart kunlari Andijon shahar Favqulodda vaziyatlar bo‘limi, Suv oqava, Toza hudud unitar korxonasi, Avtoyo‘l boshqarmasi va Obodonlashtirish boshqarmalarining 20 ga yaqin maxsus texnikalari yordamida shahar ko‘chalari va ko‘p qavatli uylar yerto‘lasiga to‘plangan suvlar tortib olinib, yo‘l bo‘ylaridagi bino-inshootlarga kirib ketishining oldini olingan.
Qo‘shimcha qilinishicha, suv to‘lishi sabab, shaharning Amir Temur shohko‘chasi (temiryo‘l vokzali hududi), Sharof Rashidov ko‘chasi (Bolalar bog‘i ro‘parasi) hamda Bobur shohko‘chasi (FVB binosi oldi)da avtomobillarning harakati vaqtincha to‘xtatilgan.
Andijon tumani hokimligining ma’lum qilishicha, yog‘ingarchilik oqibatida tumanning “Sanoat” mahallasidagi Omad ko‘chasida yashovchi Rahimovlar hamda “Bobog‘ozi” mahallasining Chorbog‘ ko‘chasida yashovchi Jo‘rayevlarning yashash xonadonlari hovlisida yig‘ilib qolgan suvlar Favqulodda vaziyatlar bo‘limi xodimlari tomonidan bartaraf etilgan.
Shuningdek, Baliqchi tumanining “Oqqo‘rg‘on”, “Avesto” mahallalarida vujudga kelgan favqulodda holatlar texnikalar jalb etilgan holda bartaraf etilgan.
Izoh (0)