Investitsiyalar va tashqi savdo vazirligi tadbirkorlarni qo‘llab-quvvatlash shtabini ishga tushirdi

O‘zbekiston Respublikasi Investitsiyalar va tashqi savdo vazirligida tadbirkorlarni qo‘llab-quvvatlash bo‘yicha shtab o‘z ishini boshladi. Bu haqda vazirlik matbuot xizmati xabar bermoqda.

Qayd etilishicha, unda turli sohalarda, jumladan, investitsiyalarni jalb qilish va yangi ishlab chiqarish obyektlarini tashkil etish, tashqi savdo, transport va tranzit salohiyatini rivojlantirish, xalqaro hamkorlikni targ‘ib qilish, importni optimallashtirish va boshqa muhim yo‘nalishlarda ixtisoslashgan kichik guruhlarga taqsimlangan mamlakat vazirliklari va idoralarining malakali xodimlari faoliyat ko‘rsatmoqda.

Shtab xodimlari mahalliy tadbirkorlar, ishlab chiqaruvchilar va eksportchilar o‘z amaliyotda duch keladigan tizimli va xususiy xarakterdagi muammolarni aniqlash maqsadida ular bilan manzilli tarzda hamkorlik qilib kelmoqda.

Qabul qilingan ma’lumotlar har tomonlama tahlil qilinadi, uning natijalari asosida tizimli muammolarni bartaraf etish bo‘yicha takliflar va algoritmlar ishlab chiqiladi. Tadbirkorlarning muammoli masalalari ham puxta o‘rganilib, aniqlangan kamchiliklarni zudlik bilan bartaraf etish yuzasidan mutasaddi vazirlik va idoralarga ko‘rsatmalar berilmoqda.

Shtabda ko‘rilayotgan amaliy chora-tadbirlar samaradorligini nazorat qilish mexanizmi joriy qilingan. Xususan, tegishli muvofiqlashtiruvchi kichik guruh tadbirkorlar bilan bevosita muloqotda bo‘lib, vazirlik va idoralar ularning murojaatlariga qanchalik tez va samarali javob berayotganligini aniqlaydi.

Har bir kunning oxirida shtab faoliyatining natijalari yuzasidan tezkor hisobot shakllantiriladi va tahlil qilish uchun tashqi savdo, investitsiyalar, mahalliy sanoatni rivojlantirish va texnik jihatdan tartibga solish bo‘yicha hukumat komissiyasiga yuboriladi.

Tadbirkor va eksportchilar o‘z muammolari bilan, shuningdek o‘zlarini qiziqtirgan masalalar bo‘yicha maslahat olish uchun istalgan vaqtda shtab xodimlari bilan bog‘lanishlari mumkin. Barcha masalalar qisqa muddatda o‘rganiladi va hal qilinadi.

Murojaatlar, shuningdek, O‘zbekiston Respublikasi Savdo-sanoat palatasining Call-markazi tomonidan keyinchalik shtabga tezkor ravishda yuborish uchun qabul qilinadi.