Инвестициялар ва ташқи савдо вазирлиги тадбиркорларни қўллаб-қувватлаш штабини ишга туширди

Ўзбекистон Республикаси Инвестициялар ва ташқи савдо вазирлигида тадбиркорларни қўллаб-қувватлаш бўйича штаб ўз ишини бошлади. Бу ҳақда вазирлик матбуот хизмати хабар бермоқда.

Қайд этилишича, унда турли соҳаларда, жумладан, инвестицияларни жалб қилиш ва янги ишлаб чиқариш объектларини ташкил этиш, ташқи савдо, транспорт ва транзит салоҳиятини ривожлантириш, халқаро ҳамкорликни тарғиб қилиш, импортни оптималлаштириш ва бошқа муҳим йўналишларда ихтисослашган кичик гуруҳларга тақсимланган мамлакат вазирликлари ва идораларининг малакали ходимлари фаолият кўрсатмоқда.

Штаб ходимлари маҳаллий тадбиркорлар, ишлаб чиқарувчилар ва экспортчилар ўз амалиётда дуч келадиган тизимли ва хусусий характердаги муаммоларни аниқлаш мақсадида улар билан манзилли тарзда ҳамкорлик қилиб келмоқда.

Қабул қилинган маълумотлар ҳар томонлама таҳлил қилинади, унинг натижалари асосида тизимли муаммоларни бартараф этиш бўйича таклифлар ва алгоритмлар ишлаб чиқилади. Тадбиркорларнинг муаммоли масалалари ҳам пухта ўрганилиб, аниқланган камчиликларни зудлик билан бартараф этиш юзасидан мутасадди вазирлик ва идораларга кўрсатмалар берилмоқда.

Штабда кўрилаётган амалий чора-тадбирлар самарадорлигини назорат қилиш механизми жорий қилинган. Хусусан, тегишли мувофиқлаштирувчи кичик гуруҳ тадбиркорлар билан бевосита мулоқотда бўлиб, вазирлик ва идоралар уларнинг мурожаатларига қанчалик тез ва самарали жавоб бераётганлигини аниқлайди.

Ҳар бир куннинг охирида штаб фаолиятининг натижалари юзасидан тезкор ҳисобот шакллантирилади ва таҳлил қилиш учун ташқи савдо, инвестициялар, маҳаллий саноатни ривожлантириш ва техник жиҳатдан тартибга солиш бўйича ҳукумат комиссиясига юборилади.

Тадбиркор ва экспортчилар ўз муаммолари билан, шунингдек ўзларини қизиқтирган масалалар бўйича маслаҳат олиш учун исталган вақтда штаб ходимлари билан боғланишлари мумкин. Барча масалалар қисқа муддатда ўрганилади ва ҳал қилинади.

Мурожаатлар, шунингдек, Ўзбекистон Республикаси Савдо-саноат палатасининг Call-маркази томонидан кейинчалик штабга тезкор равишда юбориш учун қабул қилинади.