“Tottenhem” hujumchisi Harri Keyn “shporlar” safida ketma-ket 7 o‘yindan buyon gol urib kelmoqda.
“Tottenhem” hujumchisi APLning 27-turi doirasida “Brayton”ga qarshi bahsda (2:0) o‘z hisobiga gol yozdirib qo‘ydi. Avvalroq “Manchester Siti” (3:2) va “Everton”ga (5:0) qarshi bahslarda dubl qayd etgandi, undan tashqari “Lids” (4:0) va “Manchester Yunayted”ga (2:3) qarshi o‘yinlarda ham gol urgan.
28 yoshli Keyn APL joriy mavsumidagi 12-golini urdi va Krishtianu Ronaldu, Diogu Jota, Sadio Mane bilan birgalikda to‘purarlar ro‘yxatida ikkinchi o‘rinni egallab turibdi. Muhammad Saloh 20 ta gol bilan yetakchilik qilmoqda.
Harri Keyn APLda yana bir natijani qayd etdi. “Shporlar” hujumchisi APLning mehmondagi o‘yinlarida 95 ta golga mualliflik qildi. “Brayton”ga qarshi bahs ingliz futbolchisi uchun mehmondagi 139-o‘yin bo‘ldi.
Keyn Ueyn Runini ortda qoldirib, musobaqa tarixida mehmondagi o‘yinlar bo‘yicha eng yaxshi to‘purarga aylandi. Runi hisobida 243 ta o‘yinda 94 ta gol mavjud edi.
O‘tgan mavsum Harri APLda bir klub safida safarda urilgan gollar soni bo‘yicha rekordni yangilagandi.
Ma’lumot uchun, Harri Keyn “Tottenhem” tarbiyalanuvchisi hisoblanadi. Futbolchi faoliyati davomida “Leyton Orient”, “Milluoll”, “Norvich” va “Lester” sharafini himoya qilgan. 2013-yildan buyon “shporlar” safida to‘p surib keladi. 2021/22-yilgi mavsum barcha musobaqalarda 40 ta o‘yinda maydonga tushib, 22 ta golga mualliflik qildi.
Izoh (0)