Qashqadaryo viloyatida 3 ta holatda “jihodchilar” oqimi tarafdorlari faoliyatiga chek qo‘yildi, deb xabar bermoqda Davlat xavfsizlik xizmati.
Qayd etilishicha, DXX Qashqadaryo viloyati bo‘yicha boshqarmasi xodimlari tomonidan viloyat Ichki ishlar boshqarmasi bilan hamkorlikda terrorizm va ekstremizmga qarshi kurashish doirasida bir nechta tezkor tadbirlar o‘tkazilgan. Xususan, Q.G‘. ismli shaxs (1975-yilda Shahrisabz tumanida tug‘ilgan) 2017—2020-yillarda Rossiyada ishlab, ijtimoiy tarmoqlar orqali “Jihodchilar” diniy-ekstremistik oqimi a’zolari ta’siriga tushib qolgan. U oqim g‘oyalarini qo‘llab-quvvatlagan. Doimiy yashash manziliga qaytib kelganidan keyin atrofidagilarga ushbu oqim g‘oyalarini targ‘ib qilgan hamda 6 kishidan iborat noqonuniy guruh tashkil etgan.
Boshqa holatda esa T.M. (1995-yilda Kasbi tumanida tug‘ilgan) 2016—2021-yillarda mehnat migranti sifatida Moskva shahrida bo‘lgan davrida diniy-ekstremistik va aqidaparastlik g‘oyalari bilan yo‘g‘rilgan materiallarni ko‘rib, ekstremistik oqim tarafdorlari ta’siriga tushib qolgan. Doimiy yashash manziliga qaytganidan keyin ekstremistik mazmundagi materiallarini yaqin tanishlariga targ‘ib qilgan. Shuningdek, uylanganidan so‘ng turmush o‘rtog‘i bilan birga Suriyadagi terroristik tashkilotlar safiga borib qo‘shilishni rejalashtirgan.
Bundan tashqari, Mirishkor tumanida yashovchi T.J. (1996-yilda tug‘ilgan) Telegram messenjerida profil ochib, u orqali DEO a’zolari tomonidan tayyorlanib, internetga joylashtirilgan aqidaparastlik g‘oyalari bilan yo‘g‘rilgan materiallarni virtual guruhdagi do‘stlariga tarqatgani hamda ular bilan o‘zaro muhokama qilgani aniqlangan.
Hozirda barcha holatlar yuzasidan Jinoyat kodeksining tegishli moddalari bilan qo‘zg‘atilgan jinoyat ishlari doirasida ularning boshqa aloqalarini aniqlash bo‘yicha ham tegishli chora-tadbirlar amalga oshirilmoqda.
Mavzuga doir:
Izoh (0)