Qashqadaryo viloyatining Qamashi tumanida Lacetti haydovchisi fuqaroni mashinada sudrab ketdi. Bu haqda “Daryo”ga ma’lum qilgan viloyat IIB axborot xizmati rahbari Javlon Baxtiyev voqea 2022-yilning 8-mart kuni Qamashi tumanida sodir bo‘lganini bildirdi.
“2022-yil 8-mart kuni soat 08:00 da Qamashi tumani ‘Badaxshon’ MFYda yashovchi fuqaro X.A. boshqaruvidagi Lacetti’da Qamashi dehqon bozori yonidan o‘tgan ko‘chadan harakatlanib borib, fuqaro H.S. boshqaruvidagi Damas’ga urilgan. Damas haydovchisi Lacetti haydovchisiga nima sababdan mashinasiga kelib urilganini so‘ragan.O‘zaro tortishuvdan so‘ng ikki haydovchi janjallashib qolgan. Shunda Lacetti haydovchisi mashinasiga o‘tirib, eshikni yopgan va tezda harakatlangan. Damas haydovchisining choponi Lacetti eshigiga ilinib qolgani bois haydovchi uni qisqa masofaga sudrab borgan. Natijada, Lacetti haydovchisi shoshib qolib fuqaro S.Z. va R.F.ga tegishli yana ikkita Damas’ga urilgan”, — deydi Javlon Baxtiyev.
Qo‘shimcha qilinishicha, holat yuzasidan Lacetti haydovchisining harakatlarida Ma’muriy javobgarlik to‘g‘risidagi kodeksning 128-moddasi 1-qismida nazarda tutilgan huquqbuzarlik (haydovchilarning transport vositalarini piyodalar yo‘lkalaridan yurgizishi, yo‘l belgilari yoki yo‘lning qatnov qismidagi chiziqlar bilan belgilab qo‘yilgan talablarga rioya etmasligi odam tashish, transport vositalarini quvib o‘tish, yo‘nalishli transport vositalari to‘xtaydigan bekatlardan yoki piyodalar o‘tish joylaridan yurish, tashqi yoritish asboblaridan foydalanish qoidalarini buzishi, xuddi shuningdek yo‘lovchilarga loyqa sachratishi) alomatlari bo‘lgani bois, ma’muriy tartibda chora ko‘rish uchun to‘plangan hujjatlar tuman IIB YHXBga o‘tkazilgan. Holat yuzasidan Qamashi tuman IIB YHXB tomonidan surishtiruv harakatlari olib borilmoqda.
Izoh (0)