Қашқадарё вилоятининг Қамаши туманида Lacetti ҳайдовчиси фуқарони машинада судраб кетди. Бу ҳақда «Дарё»га маълум қилган вилоят ИИБ ахборот хизмати раҳбари Жавлон Бахтиев воқеа 2022 йилнинг 8 март куни Қамаши туманида содир бўлганини билдирди.
«2022 йил 8 март куни соат 08:00 да Қамаши тумани ‘Бадахшон’ МФЙда яшовчи фуқаро Х.А. бошқарувидаги Lacetti’да Қамаши деҳқон бозори ёнидан ўтган кўчадан ҳаракатланиб бориб, фуқаро Ҳ.С. бошқарувидаги Damas’га урилган. Damas ҳайдовчиси Lacetti ҳайдовчисига нима сабабдан машинасига келиб урилганини сўраган.Ўзаро тортишувдан сўнг икки ҳайдовчи жанжаллашиб қолган. Шунда Lacetti ҳайдовчиси машинасига ўтириб, эшикни ёпган ва тезда ҳаракатланган. Damas ҳайдовчисининг чопони Lacetti эшигига илиниб қолгани боис ҳайдовчи уни қисқа масофага судраб борган. Натижада, Lacetti ҳайдовчиси шошиб қолиб фуқаро С.З. ва Р.Ф.га тегишли яна иккита Damas’га урилган», — дейди Жавлон Бахтиев.
Қўшимча қилинишича, ҳолат юзасидан Lacetti ҳайдовчисининг ҳаракатларида Маъмурий жавобгарлик тўғрисидаги кодекснинг 128-моддаси 1-қисмида назарда тутилган ҳуқуқбузарлик (ҳайдовчиларнинг транспорт воситаларини пиёдалар йўлкаларидан юргизиши, йўл белгилари ёки йўлнинг қатнов қисмидаги чизиқлар билан белгилаб қўйилган талабларга риоя этмаслиги одам ташиш, транспорт воситаларини қувиб ўтиш, йўналишли транспорт воситалари тўхтайдиган бекатлардан ёки пиёдалар ўтиш жойларидан юриш, ташқи ёритиш асбобларидан фойдаланиш қоидаларини бузиши, худди шунингдек йўловчиларга лойқа сачратиши) аломатлари бўлгани боис, маъмурий тартибда чора кўриш учун тўпланган ҳужжатлар туман ИИБ ЙҲХБга ўтказилган. Ҳолат юзасидан Қамаши туман ИИБ ЙҲХБ томонидан суриштирув ҳаракатлари олиб борилмоқда.
Изоҳ (0)