Qamchiq dovonida 15-mart kuni yo‘l chetiga tosh-tuproq massasi to‘kilib tushdi. Bu haqda Favqulodda vaziyatlar vazirligi xabar qildi.
Qayd etilishicha, shu kuni soat 10:30 larda “Qamchiq” maxsus qidiruv, yong‘in-qutqaruv boshqarmasiga Angren—Pop elektrlashtirilgan temiryo‘lining 71-kilometri va A-373-avtomobil yo‘li Toshkent—Vodiy yo‘nalishining 232,2-kilometrida yo‘l chetiga tosh-tuproq massasi tushgani bo‘yicha xabar kelib tushgan.
Voqea joyiga FVV qutqaruvchilari va tegishli tashkilot xodimlari yetib borib, vaziyatni o‘rgangan. Hozirda hududlarda vaziyat oqibatlarini bartaraf etish tadbirlari olib borilmoqda. Shuningdek, yog‘ingarchilik mavsumini betalafot o‘tkazish maqsadida dovon yo‘lida qo‘shimcha yana 3 ta mexanizatsiyalashtirilgan post tashkil etilgan.
Bundan tashqari, me’yoridan ko‘p yog‘ingarchilik yog‘ishi oqibatida Amirsoy tog‘-chang‘i kurortiga olib boruvchi avtomobil yo‘lida tuproq ko‘chishi sodir bo‘lgan. Yo‘l qatnov qismida harakat vaqtinchalik to‘xtatilgan.
“Toshkent viloyati Bo‘stonliq tuman FVB va tuman yo‘llardan foydalanish unitar korxonasi xodimlari tomonidan vujudga kelgan noqulayliklarni bartaraf etish choralari ko‘rilmoqda”, — deyiladi xabarda.
Qashqadaryo viloyatida joylashgan Hisor davlat qo‘riqxonasining G‘ilon bo‘limida qor ko‘chish holatlari kuzatilgan. 14-mart kuni Turkuluk darasidagi Oqtosh soyida ko‘chgan qor ko‘chkisining eni taxminan 25 metrni, balandligi 15 metrni va uzunligi 550 metrni tashkil qilgan.
Shu daraning Dori Hoji soyida sodir bo‘lgan qor ko‘chkisining eni esa 150 metrni, balandligi 20—22 metrni, uzunligi 900—1000 metrni tashkil qilgan. Ko‘chkilar talafotsiz o‘tgan.
“O‘zgidromet” xabariga ko‘ra, 17—20-mart kunlari O‘zbekiston hududiga Erondan iliq va nam havo, so‘ngra Volgabo‘yi hududlaridan sovuq havo massasi kirib kelishi kutilmoqda. Kuchli yomg‘irlar sababli O‘zbekistonning 9 ta viloyatida sel kelish xavfi e’lon qilingan.
Avvalroq Qamchiq dovoni hududida 15—18-mart kunlari kuchli yog‘ingarchilik kuzatilishi xabar qilindi. Qayd etilishicha, shu kunlari hududda vaqti-vaqti bilan kuchli yog‘ingarchilik, tuman tushishi kuzatiladi. Ko‘ruvchanlik 50 metrgacha pasayishi, shamol tezligi 20—23 metr/sekundgacha kuchayishi, yo‘llarda qor uyumlari yuzaga kelishi mumkin bo‘ladi.
Respublika Gidrometeorologiya markazining 15-mart, seshanba kuni uchun ob-havo prognozida tog‘li hududlarda havo o‘zgarib turishi, vaqti-vaqti bilan yog‘ingarchilik (yomg‘ir, qor) kuzatilishi, momaqaldiroq bo‘lishi aytilgandi.
Eslatib o‘tamiz, 12-mart kuni Qamchiq dovonidagi ikki tunnel orasida joylashgan hududda bir kecha-kunduzda juda ko‘p yog‘ingarchilikdan hosil bo‘lgan suv oqimi avtomobil yo‘lining ostki qismini o‘pirib tushirgan. Shuningdek, Taxtaqoracha dovonida 13-mart kuni kuchli yomg‘ir yog‘ishi oqibatida M-39 avtomobil yo‘lining 1138–1141-kilometrida qisman o‘pirilish yuzaga kelib, transport vositalarining harakati vaqtincha cheklangan.
Izoh (0)