YHXX Qamchiq dovonida qor ko‘chkisi sodir bo‘lgani haqida xabar qildi

Qamchiq dovonida 15-mart kuni qor ko‘chkisi sodir bo‘ldi, deb xabar bermoqda Yo‘l harakati xavfsizligi xizmati.

YHXX xabarida aytilishicha, shu kuni soat 12:40 larda dovondan o‘tgan A-373 avtomobil yo‘lining 232—233-kilometrlari oralig‘ida qor ko‘chkisi sodir bo‘lgan. Shu sabab transport vositalarining harakati 15-20 daqiqaga vaqtincha cheklangan. Yo‘l to‘liq tozalanib, mashinalar harakati uchun ruxsat berilgan.

“O‘zgidromet” bu xabarga raddiya berdi. Qayd etilishicha, qor ko‘chkisi sodir bo‘lgani to‘g‘risida noto‘g‘ri axborot tarqatilgan. Mutaxassislar vaziyatga oydinlik kiritib, hech qanday ko‘chki yuz bermaganini aniqlagan.

Shuningdek, “Qamchiqavtoyo‘l” unitar korxonasi ham dovonida qor ko‘chkisi kuzatilmaganini ma’lum qildi. Avtomobil yo‘lida soat 12:35 dan 12:45 gacha 6 dona BDO-5 to‘siqlarni o‘rnatish uchun 10 daqiqa muddatga avtotransport vositalari harakati cheklangan. O‘rnatish ishlari yakunlangandan so‘ng, harakat tiklangan. Yog‘ingarchilik sabab yo‘l xandaqlariga tushgan tog‘ jinslaridan tozalash ishlari bajarilgan. Hozirgi vaqtda avtotransport vositalari ikki tomonlama harakatlanmoqda.

Keyinchalik qor ko‘chkisi sodir bo‘lgani haqidagi xabar Yo‘l harakati xavfsizligi xizmatining Telegram’dagi kanalidan o‘chirildi.