Халқаро провайдерларнинг Россиядан кетиши туфайли Ўзбекистонда интернет билан муаммолар юзага келиши мумкин

Lumen магистрал интернет провайдери Россиядан кетиши ҳақида эълон қилди. Дунёнинг энг йирик магистралларидан бирини бошқарувчи компания Россия ташкилотлари билан трафик алмашинувни тўхтатишини маълум қилди.

Бундан ташқари, яна бир энг йирик асосий интернет провайдерлардан бири бўлмиш Cogent компанияси ҳам Россиядан чиқиб кетаётгани ҳақида эълон қилган.

Lumen ва Cogent — Россиянинг бир неча етакчи компаниялари учун халқаро транзит хизматларининг йирик таъминотчиларидир. Уларнинг мижозлари қаторида, масалан, «Ростелеком», «ТТК» ва VEON компаниялари бор.

VEON ва ТТК Марказий Осиё мамлакатларга интернет транзити билан шуғулланади. Шундай экан, Lumen ва Cogent Россиядан чиқиб кетиши Қозоғистон, Тожикистон ва Ўзбекистон учун маълум оқибатларга сабаб бўлади, — деб изоҳлайди Кентик таҳлилий компания вакиллари. 

Таҳлилчилар провайдерларнинг кетиши Россия ва Марказий Осиё мамлакатларидаги интернетнинг ўчишига сабаб бўлмаслигини, аммо интернет каналларнинг умумий ўтказиш имкониятини пасайтириши ва уларнинг ортиқча юкланишига олиб келишини билдирмоқда.

Аввалроқ Western Union’нинг кетиши Ўзбекистонга амалга ошириладиган пул ўтказмаларига таъсир қилиши ҳақида хабар берилган эди.