10-mart kuni soat 10:00 larda Qirg‘iziston—Tojikiston chegarasi yaqinidagi Isfara tumanining “Chorkux” mahallasida ikki mamlakat chegarachilari o‘rtasida otishma sodir bo‘ldi. Tojikiston tomonidan bir nafar chegarachi halok bo‘lgan, yana ikki kishi yaralangan. Bu haqda mahalliy aholiga tayanib Asia-Plus xabar berdi.
“Qirg‘iziston chegarachilari Tojikiston hududiga (Isfara tumani, ‘Chorkux’ mahallasi) o‘tib, tojik chegarachilaridan bu hududni tark etishni talab qilgan. Og‘zaki kelishmovchilik kelib chiqdi, qirg‘iz chegarachilari birinchi bo‘lib o‘t ochdi, biznikilar javob qaytardi. Otishma oqibatida bir nafar tojik chegarachi halok bo‘ldi, ikki nafari yaralandi, shuningdek, tojik dehqonlari ham yaralandi”, — deydi manba.
Uning so‘zlariga ko‘ra, ayni vaqtda hodisa joyida ikki mamlakat huquq-tartibot organlarining xodimlari ish olib boryapti, vaziyat keskinligicha qolmoqda.
Isfara shahar markaziy shifoxonasi halok bo‘lgan va jarohat olganlar to‘g‘risidagi ma’lumotni tasdiqlagan.
Qirg‘iziston chegarachilarining versiyasiga ko‘ra, tojikistonlik chegarachilar Botken tumani “Teskey” hududida ilgari qo‘llagan harakat yo‘nalishini o‘zgartirib, yangi chegara qo‘riqlash chizig‘iga kirgan va qirg‘iz chegarachilaridan bu hududni tark etishni talab qilgan.
“Tojik chegarachilari yoniga qo‘shimcha kuchlar yetib kelgan. Tojikiston chegarachilari o‘zlarining son jihatdan ustunliklaridan foydalanib, yangi chegara chizig‘iga chiqishga harakat qildi. Biroq Qirg‘iziston chegarachilari Tojikiston harbiy xizmatchilarining niyatlarini amalga oshirishlariga imkon bermadi. Natijada, otishma boshlanib, taxminan 10 daqiqa davom etdi. Otishma natijasida qirg‘iz tomondan yarador va jarohatlanganlar yo‘q”, — deyiladi mamlakat Chegara xizmatining xabarida.
Shuningdek, ta’kidlanishicha, ikki mamlakat chegara vakillari o‘rtasida telefon muloqoti amalga oshirilgan bo‘lib, ular muzokara o‘tkazmoqda.
Eslatib o‘tamiz, 2022-yilning yanvar oxirlarida ham Qirg‘iziston va Tojikiston chegara hududlaridan birida ikki davlat harbiylari o‘rtasida otishma yuz bergandi. O‘shanda Tojikiston tomonidan 11 kishi, Qirg‘iziston tarafidan esa 4 kishiga yaralangandi.
Tojikiston va Qirg‘iziston o‘rtasidagi bu kabi nizolar 1990-yillardan buyon kuzatiladi, ikki davlat o‘rtasida 950 kilometr chegara hududi belgilab olinmagan va unda ikki tomon kelisha olmayotgan bahsli joylar juda ko‘p. Chegarani demarkatsiya va delimitatsiya qilish yuzasidan muzokaralar 2002-yilda boshlangan va shu kunga qadar ikki yuzdan ziyod komissiya yig‘ilishlari o‘tkazilib, ishchi guruhlar tuzilgan. Ayni vaqtda delimitatsiya va demarkatsiya qilish bo‘yicha chegaraning 550 kilometrga yaqin liniyasi tartibga solinishi boshlangan. Biroq ikki mamlakat o‘rtasida vaqti-vaqti bilan goh aholi, goh chegarachilar o‘rtasida nizolar, otishmalar sodir bo‘lishi to‘xtagani yo‘q.
Izoh (0)