10 март куни соат 10:00 ларда Қирғизистон—Тожикистон чегараси яқинидаги Исфара туманининг «Чоркух» маҳалласида икки мамлакат чегарачилари ўртасида отишма содир бўлди. Тожикистон томонидан бир нафар чегарачи ҳалок бўлган, яна икки киши яраланган. Бу ҳақда маҳаллий аҳолига таяниб Asia-Plus хабар берди.
«Қирғизистон чегарачилари Тожикистон ҳудудига (Исфара тумани, ‘Чоркух’ маҳалласи) ўтиб, тожик чегарачиларидан бу ҳудудни тарк этишни талаб қилган. Оғзаки келишмовчилик келиб чиқди, қирғиз чегарачилари биринчи бўлиб ўт очди, бизникилар жавоб қайтарди. Отишма оқибатида бир нафар тожик чегарачи ҳалок бўлди, икки нафари яраланди, шунингдек, тожик деҳқонлари ҳам яраланди», — дейди манба.
Унинг сўзларига кўра, айни вақтда ҳодиса жойида икки мамлакат ҳуқуқ-тартибот органларининг ходимлари иш олиб боряпти, вазият кескинлигича қолмоқда.
Исфара шаҳар марказий шифохонаси ҳалок бўлган ва жароҳат олганлар тўғрисидаги маълумотни тасдиқлаган.
Қирғизистон чегарачиларининг версиясига кўра, тожикистонлик чегарачилар Боткен тумани «Тескей» ҳудудида илгари қўллаган ҳаракат йўналишини ўзгартириб, янги чегара қўриқлаш чизиғига кирган ва қирғиз чегарачиларидан бу ҳудудни тарк этишни талаб қилган.
«Тожик чегарачилари ёнига қўшимча кучлар етиб келган. Тожикистон чегарачилари ўзларининг сон жиҳатдан устунликларидан фойдаланиб, янги чегара чизиғига чиқишга ҳаракат қилди. Бироқ Қирғизистон чегарачилари Тожикистон ҳарбий хизматчиларининг ниятларини амалга оширишларига имкон бермади. Натижада, отишма бошланиб, тахминан 10 дақиқа давом этди. Отишма натижасида қирғиз томондан ярадор ва жароҳатланганлар йўқ», — дейилади мамлакат Чегара хизматининг хабарида.
Шунингдек, таъкидланишича, икки мамлакат чегара вакиллари ўртасида телефон мулоқоти амалга оширилган бўлиб, улар музокара ўтказмоқда.
Эслатиб ўтамиз, 2022 йилнинг январь охирларида ҳам Қирғизистон ва Тожикистон чегара ҳудудларидан бирида икки давлат ҳарбийлари ўртасида отишма юз берганди. Ўшанда Тожикистон томонидан 11 киши, Қирғизистон тарафидан эса 4 кишига яраланганди.
Тожикистон ва Қирғизистон ўртасидаги бу каби низолар 1990 йиллардан буён кузатилади, икки давлат ўртасида 950 километр чегара ҳудуди белгилаб олинмаган ва унда икки томон келиша олмаётган баҳсли жойлар жуда кўп. Чегарани демаркация ва делимитация қилиш юзасидан музокаралар 2002 йилда бошланган ва шу кунга қадар икки юздан зиёд комиссия йиғилишлари ўтказилиб, ишчи гуруҳлар тузилган. Айни вақтда делимитация ва демаркация қилиш бўйича чегаранинг 550 километрга яқин линияси тартибга солиниши бошланган. Бироқ икки мамлакат ўртасида вақти-вақти билан гоҳ аҳоли, гоҳ чегарачилар ўртасида низолар, отишмалар содир бўлиши тўхтагани йўқ.