Belarusda rossiyalik jurnalist va bloger Yuriy Dudning YouTube’dagi “vDud” kanalida e’lon qilingan ayrim materiallar ekstremistik deb topildi. Mazkur qaror 10-mart kuni respublika IIV Uyushgan jinoyat va korrupsiyaga qarshi kurashish bosh boshqarmasi tomonidan qabul qilingan. Bu haqda idoraning Telegram’dagi kanali orqali ma’lum qilindi.
Xabarda qayd etilishicha, qaror Minsk markaziy tuman sudi tomonidan boshqarma taqdim etgan materiallari asosida qabul qilingan. “YouTube’dagi ‘Dud’ kanalining ‘Kommisarenko…’, ‘Qanday yashash kerak…’, va ‘…asosiy media’ roliklari ko‘nishidagi axborot mahsulotlari ekstremistik materiallar deb topildi”, — deya aniqlik kiritadi idora. Gap “Komissarenko — Belarusdagi norozilik namoyishlaridan keyingi yangi hayot”, “Vatandan ayirsalar qanday yashash kerak?” va “NEXTA — Belarus norozilik namoyishining asosiy mediasi” videomateriallari haqida ketmoqda.
Bundan tashqari, Belarus IIV fuqarolarni ekstremistik materiallarni saqlash, shuningdek, ekstremistik deya tan olingan Telegram kanallar va chatlarga obuna bo‘lish qonun bo‘yicha javobgarlikka tortilishga olib kelishi haqida ogohlantirgan.
Oldinroq Xavfsiz internet ligasi direktori, Rossiya Jamoatchilik palatasi a’zosi Yekaterina Mizulina mamlakat Bosh prokuraturasi va Adliya vazirligidan Dudning xorijdan moliyalashtirilishi tekshirishni so‘ragandi. Uning so‘zlariga ko‘ra, OAVlardagi ma’lumotlar tasdiqlansa, Xavfsiz internet ligasi Dudni Rossiya hududida xorijiy agent funksiyasini bajaruvchi deya tan olishni talab qiladi.
Izoh (0)