Европада газ нархи яна бир бор ўзининг тарихий максималини янгилади ва ҳар минг куб метр учун 3000 доллардан ошди. Бу ҳақда Лондоннинг ICE Futures биржаси маълумотларига таяниб, «Интерфакс» хабар бермоқда.
Апрель фьючерслари 7 март куни савдолар очилишида минг куб метр учун 2367 долларни ташкил этган бўлса, тез орада 3266 долларгача кўтарилди.
Февраль ойида газ учун ўртача нарх минг куб метрига 935 долларни ташкил этди.
Европада газ нархи 2021 йилнинг баҳоридан бери ошиб бормоқда. Бир йил аввал газ нархи 250-300 доллар эди ва декабрь ойида биринчи марта 2000 доллардан ошди.
Мутахассислар нархларнинг ошишини Осиёда суюлтирилган газга бўлган талаб, йирик етказиб берувчилар томонидан чекланган таъминот ва Европадаги ерости омборлари билан бандлик даражаси пастлиги билан изоҳлади.
Газ нархи ошишининг қўшимча омили Россиянинг ДХР ва ЛХР мустақиллигини тан олиши, шунингдек, Украинадаги ҳарбий ҳаракатлари ва ундан кейин Россияга қарши санкциялар жорий этилиши бўлди. Жумладан, Россиядан Германияга ўтадиган «Шимолий оқим 2» газ қувури лойиҳаси музлатиб қўйилгани ҳам бунга сабаб бўлди.
Аввалроқ Европада газ нархи минг кубометр учун қарийб 2400 долларга етгани ҳақида хабар берилган эди.
Изоҳ (0)