Rossiya prezidenti Vladimir Putin mansabdor shaxslarning bank hisob raqamlariga kelib tushgan mablag‘lar uch yil davomidagi daromadidan oshib ketsa, ularni undirib olish to‘g‘risidagi qonunni imzoladi, deb xabar beradi “RIA Novosti”.
Mazkur qonunga ko‘ra, davlat xizmatchilari, shuningdek, ularning oila a’zolari, jumladan voyaga yetmagan farzandlarining ham bank hisob raqamlari prokuratura tomonidan tekshirib boriladi. Agarda mansabdor shaxs va uning qarindoshlarini hisob raqamiga kelib tushgan mablag‘lar uch yil davomidagi umumiy daromadidan 10 ming rublga ortiq bo‘lsa, sudga ushbu mablag‘larni budjet hisobiga mabjuriy undirish bo‘yicha da’vo kiritiladi.
Puldan ayrilmaslik uchun amaldor hisob raqamidagi mablag‘lar qonuniy yo‘l bilan paydo bo‘lganini isbotlab berishi kerak bo‘ladi. Ma’lumotlarni tekshirish jarayonida prokuratura xodimlari mansabdor shaxs bilan gaplashishi, shuningdek, davlat organlari, banklar, kredit tashkilotlari va ko‘chmas mulkni ro‘yxatga olish bo‘yicha mas’ul bo‘limlarga so‘rov yuborishi mumkin.
Eslatib o‘tamiz, Rossiya 24-fevralda Ukrainada maxsus harbiy operatsiya boshlagan, ikki davlat o‘rtasidagi urushning 11-kuni davom etmoqda. 2-mart kuni Vladimir Putin Rossiya hududidan 10 ming dollardan ortiq valyuta olib chiqib ketishni taqiqlash to‘g‘risidagi farmonni imzolagandi. Mazkur farmon “AQSh hamda unga qo‘shilgan xorijiy davlatlar hamda xalqaro tashkilotlarning Rossiyaga qarshi sanksiyalar qo‘llash bilan bog‘liq do‘stona bo‘lmagan va xalqaro huquqqa zid harakatlari munosabati bilan” imzolangan.
Mavzuga doir: Rossiyada oligarxlar davri tugamoqda — Bloomberg
Izoh (0)