6—7-mart kunlari Ukrainadan Polshaning Katovitse aeroporti orqali 674 nafar O‘zbekiston fuqarosi, shu jumladan, 109 nafar ayol, 57 nafar voyaga yetgaman shaxs va 12 nafar chaqaloq olib kelindi. Bu haqda Tashqi ishlar vazirligi rasmiy vakili xabar qildi.
Ma’lum qilinishicha, 28-fevraldan 7-martga qadar 19 ta aviareys tashkillashtirilgan hamda urush bo‘layotgan joylardan 4 359 nafar O‘zbekiston fuqarosi vataniga qaytarilgan.
Shuningdek, 7-mart kuni yana bitta reysni amalga oshirish rejalashtirilgan.
Polsha hududida O‘zbekistonning 350 dan ortiq fuqarosi qolmoqda. Ulardan 80 nafari Polsha davlat chegarasidagi to‘planish nuqtasiga, qariyb 270 nafari esa Katovitse aeroportiga joylashtirilgan.
“O‘zbekistonning Ukrainadagi elchixonasi vatandoshlar bilan doimiy muloqot olib bormoqda. Diplomatlar Ukrainaning turli nuqtalarida, shu jumladan, jang harakatlari davom etayotgan hududlarda bo‘lib, fuqarolarimizni evakuatsiya qilish ishlarini amalga oshirmoqdalar”, — deyiladi xabarda.
O‘zbekistonning Ukrainadagi elchixonasi fuqarolarga Moldovaga borish osonroq bo‘lsa, ushbu variantni ko‘rib chiqishlari lozimligini bildirgandi. Ushbu fuqarolarning keyinchalik vataniga evakuatsiya qilinishini tashkil etish uchun elchixona tomonidan ularning ro‘yxati va ma’lumotlar bazasi shakllantirilmoqda.
Ukraina fuqaroligini olgan yoki O‘zbekistonliklar bilan oila qurgan boshqa davlat fuqarolari ushbu davlatdan pullik asosda evakuatsiya qilinishi mumkin.
Izoh (0)